hósdagur 24. juli 2014síða 27

nr. 84 · 25. juli 2014 7 Fanga eitt síl Størstu vøtnini í Føroyum finnur tú í Vágoy, og har eru ríkir møguleikar at stressa av og fanga eitt síl ella bæði tvey. Sørvágsvatn/Leitisvatn er ómakaleyst at koma til, náttúran er vøkur, og við so mongum sílum má tað vera mest gevandi løtan, tú gevur tær sjálvum. Fjallavatn liggur vakurt og friðsælt, og har eru nógv stór og góð síl at fanga. Hviltkinnavatn og Vatnsdalsvatn liggja meira fjald og hava færri síl, men hinvegin er náttúran einastandandi, og túrurin er ógloymandi vakur. Fiskikort krevst fyri at fiska á vøtnunum, sum tú kanst keypa á Vága Kunningarstovu. FÁ MEIRA AT VITA Á VÁGA KUNNINGARSTOVU Útferð við skúlaskipinum Draganum Kom við á útferð við stásiliga skúlaskipinum Draganum. Sjónin, ið møtir tær á veg norður undir tey stórslignu fuglabjørgini á Kalsoynni og Kunoyarnakki, er ótrúliga flott og stórbær. Tú kanst ikki annað enn gerast stoltur av tínum landi, tá tú situr umborð á Draganum og eygleiðir Føroyar frá síni bestu síðu. Umborð á Draganum er hugnaligt lugarprát, góð súpan og heitt kaffi at fáa. Túrurin verður gjørdur hvønn fríggjadag og varir millum tveir og tríggjar tímar. FÁ MEIRA AT VITA Á NORÐOYAR KUNNINGARSTOVU Kvøldseta í Dali Fólkalívsmyndin „Kvøldseta“ kann gerast veruleiki, um vitjað verður í Dali. Her skipar bygdarfólkið fyri kvøldsetu í bygdarhúsinum Eiriksgarði, har børn, ung, tilkomin og gomul savnast at spinna, karða, nappa, binda og mangt annað. Víst verður eisini á gomul føroysk barnaspøl. sagt verður frá søgu, sagnum og ævintýrum, og sungin verður onkur miðaldarvísa ella okkurt skjaldur. Farið verður upp á gólv við góðum kvøðarum úr Dali. Eisini verður boðið breyð við góðum føroyskum viðskera. FÁ MEIRA AT VITA Á SANDOYAR KUNNINGARSTOVU Útferð til Mykinesar Mykines má vera kendasta oyggj í Føroyum – og tað er ikki av tilvild, tí oyggin er ein sonn náttúruperla. Hvørt ár tyrpast ferðafólk á oynni fyri vestan, bæði útlendsk og føroysk. Mykines er kend fyri sítt ríka fuglalív, súluna og lundalandið, fyri vakra náttúru og fyri brúnna um Hólmgjógv. Við staðkendum ferðaleiðara eru tit í góðum hondum. Túrurin varir á leið 7½ tíma, og við í prísinum á 750 krónur er sigling og ferðaleiðari. FÁ MEIRA AT VITA Á VÁGA KUNNINGARSTOVU Til gongu millum dalar og fjøll á Streymoynni Streymoyggin hevur bæði høg fjøll, djúpar dalar og nógvar fjallagøtur. Serliga eru tað túrarnir fyri vestan, til Kirkjubøar og eftir gøtunum kring Tórshavn, sum verða gingnir. Fyri vand gongufólk er túrurin fyri vestan einastandandi, og fjallagøtan til Kirkjubøar er ein lættur túrur, sum er væl egnaður til familjur. Túrurin úr Havn til Kirkjubøar kostar 200 krónur, meðan túrurin fyri vestan kostar 300 krónur. FÁ MEIRA AT VITA HJÁ VISIT TÓRSHAVN Ferðast í Føroyum Lagt til rættis: Óli Jákup Jacobsen