hósdagur 11. desember 2014síða 45

21 Mentanarblaðið hjá Miðlahúsinum 8 • 12. desember 2014 Noregi er eitt av okkara nærmastu grannalondum, ikki bara landafrøðiliga, men eisini málsliga og mentanarliga. Vit smílast at teirra syngjandi tónalagi, elska teirra skiferiuøkir, øvunda teimum teirra oljupengar og ilskast inn á bastantu politisku linjuna í fiskisamráðingum. Um Ísland er okkara stuttligi stóribeiggi fyri eystan er Noregi okkara mæta stórasystir fyri vestan. Men hvat vita vit í veruleikanum um samtíðarlistina og listafólkini, sum virka í Noregi í dag? Norðurlandahúsið setur sjóneykuna á Noregi eina heila viku og bjóðar fleiri av mætastu listaprofilunum higar at framføra og sýna fram sína list. Livandi list - Lars Kjemphol Lars Kjemphol fer alla vikuna at skapa eina framsýning úr alskyns tilfari, sum er til taks hjá honum, meðan hann arbeiðir, og áskoðarar síggja listaverkið vaksa fram úr ongum. Sostatt verða áskoðarar vitni til listarligu tilgongdina og ein part av tí gransking, teimum royndum og tankum, sum eru við til at skapa listaverkið. Konsert - Føroya Symfoniorkestur og Tine Thing Helseth Norska Tine Thing Helseth er ein av heimsins bestu trompet­ leikarum og hevur vunnið nógva viðurkenning og virðislønir fyri sínar virtuosu framførslur. Hon útgav sína fyrstu solofløgu í 2012 hjá útgávufelagnum EMI. Tine er nógv umbiðin sum solistur men hevur eisini tveir bólkar, sum hon hevur stovnað, og sum hon framførir javnan saman við. Til hesa konsertina saman við Føroya Symfoniorkestri, fara vit at uppliva tí klassisku síðuna av Tine og hennara trompet. Konsert - Tine Thing Helseth Quintet / TTHQ Tine Thing Helseth kvintettin varð stovnað í 2010 sum ein jazz/ tango/fusión bólkur við trompetini sum soloinstrumenti og fylgispæli av guitar, kontrabassi, trummum og klaveri. Heimspekin handan TTHQ er at bert spæla tónleik, ið teimum dáma, og tað kann vera alt frá Piazzolla tango, írskum fólkatónum, kabaret sangum til nútímans fusiónstónleik. Við hesi heimspekini er kvintettin kend fyri sína spæligleði, sum smittar av á áhoyrara­ fjøldina. Dansisýning - Grænsen / Markið - Jo Strømgren Kompani Ein maður og ein kona deila skrivstovu. Tey sýnast hava virðing fyri hvør øðrum, men undir yvirflatuni herjar ein økisbardagi. Við eitt sindur av hugflogi kann áskoðarin tulka kynskamp, kensluligt ósjálvbjargni og politiskar trætur um landamørk. Framførslan hevur síðan 2011 turnerað í Danmark, Finnlandi, Makedonia, Noregi, Russlandi, Suðurafrika, Svalbard og Kina. Konsert - Tini Tini er nýgg stjørna á norska tónleikapallinum og ein av hennara lærumeistarum, ið fekk eyga á hennara stóra talent, er eingin minni enn AHA sangarin Morten Harket. Í oktober í fjør útgav hon sína fyrstu fløgu “Undo my heart”, sum er framleidd í London. Tónleikastílurin er eitt bland av melodiøsum singer-songwriter poppi við einum serligum norskum kryddi og vøkru røddini hjá Tini í sentrum. LAND Í EYGSJÓN