mikudagur 24. juni 2015síða 37

SOSIALURIN oyggjaleikir 13 1939 27. juni - 3. juli 2015 Flogbóltsmenninir eru í góðari tíð komnir upp á pláss á Jersey, og við sær hava teir góðar royndir frá EM-undankappingini fyri smátjóðir, har tað eydnaðist at gerast nummar fýra av fimtan tjóðum, harav tríggjar tær fremstu koma við til sjálvt EM-endaspælið. – Hetta vóru avbera góðar royndir hjá okkum at fáa beint undan oyggjaleikunum, og eg haldi, at vit eru væl fyri og klárir til tær avbjóðingar, ið bíða okkum her á Jersey, sigur Bárður Bendix Mikkelsen, ið síðani í fjør hevur verið lands­liðs­ venjari hjá monnunum. – Í mun til fyri tveimum árum síðani, hava vit fingið munandi meira dystarvenjing, tí vit hava jú eisini fingið tveir dystir ímóti Íslandi í upptaktini til oyggjaleikirnar, sigur venjarin, ið ikki sjálvur minnist frá síni tíð sum landsliðsspælari, at so nógvir dystir vóru á skránni undan einum oyggja­ leikum. Hann vísir á, at slíkar royndir eiga at koma liðnum til góðar á Jersey, og serliga fegnast hann um, at mótstøðan frá bæði Luxembourg, Skotlandi og Kypros var so mikið hørð í EM- undan­kappingini, at flogbóltsmenninir veruliga fingu seg royndar. Bjarni einki spælt Samstundis sum Bárður Bendix Mikkelsen stað­festir, at manningin er væl fyri og liðið við hesum mongu dystunum hevur fingið ta dystar­ venjing, ið skal til, hevur hann kanska enn ikki sæð liðið í kanska sterkastu uppstilling, tí ein av spælarunum, ið dagliga spælir uttanlands, var ikki inni í nøkrum av dystunum niðri í Luxembourg. – Bjarni Larsen bleiv skaddur, beint áðrenn vit fóru avstað, og var talan um ein knæskaða, sum blussaði uppaftur. Vit valdu at spara hann til hesar tríggjar dystirnar, tí vit heldur vildu hava hann við á oyggjaleikunum, sigur lands­liðs­ venjarin. – At hann sær út til at koma fyri seg, so vit kunnu brúka hann á Jersey, ger beinanvegin hópin hjá okkum breiðari, og samstundis hava vit fingið roynt menn á plássinum hjá Bjarna. Í Luxem­bourg fingu vit roynt tað, sum vit skuldu, so vit nú vita, hvat riggar væl og hvat vit kanska skulu royna at gera betri. Burtursæð frá skaðanum hjá Bjarna, sum við sínum royndum frá norska BK Tromsø man vera ein av frægastu monnunum á landsliðnum, hava ikki verið aðrir skaðar ella aðrar forðingar, so fyri­reikingarnar hava gingið eftir vild. Seta sær smá mál Á Jersey eru Føroyar í bólki saman við Saaremaa, Cayman Islands og Isle of Man, sum eru trý sera ymisk lið, ið hvørt á sín hátt kunnu geva Føroyum trupulleikar. – Saaremaa altíð er við í toppinum, meðan Cayman Islands ofta er svingandi og Isle of Man ikki má undirmetast, tí »geisturin« er stórur. Spæla vit upp til okkara besta, kunnu vit í fyrsta lagi satsa uppá at koma í hálvfinalu, og so fáa vit at síggja, hvat meira skal til, sigur Bárður. – Men møta vit Saaremaa tvær ferðir á oyggja­leikunum, so eri eg nøgdur, tí tá verður tað í finaluni seinnu ferð. Øll tey trý liðini, vit spældu ímóti í Luxembourg, eru øll væl sterkari enn Saaremaa, og har fingu vit so í nøkrum settum víst, at vit saktans kunnu spæla upp ímóti teimum, so alt ber til. Hann sigur tó, at fokuseringin hjá liðnum ikki liggur so langt frammi sum í hálvfinalu og finalu, tí fyrst og fremst fara teir eftir at røkkta tey smáu málini. – Hetta verður ein long vika, og nógv skal ganga upp, longu frá tí fyrsta dystinum, so tor­ ført er at siga, hvar vit enda, tí vit kenna ikki allar av­bjóð­ingarnar enn. Men vit kunnu altíð droyma um at koma langt og fara eftir møgu­leikanum, sigur Bárður Bendix Mikkelsen. Nógva dystarvenjing Flogbóltsmenninir eru betri fyrireikaðir til hesar oyggjaleikirnar enn leingi, og serliga kemur væl við, at liðið hevur fingið nógva dystarvenjing – bæði í EM-dystum og vinardystum. – Vit eru væl fyri, sigur venjarin, Bárður Bendix Mikkelsen Flogbóltur menn: 1 Rasmus Mortensen Potts, Fleyr 2 Steffan Rosenlund Olsen, Mjølnir 3 Bárður Jacobsen, ÍF 4 Bergur Olsen, Fleyr 5 Bjarni Larsen, BK Tromsø 6 Thorvald Danielsen, HIK Aalborg 7 Bjarki Enni, Amager VK 8 Bogi Midjord, Amager VK 9 Rói Hentze, Fleyr 10 Trygvi Hansen, ÍF 11 Suni Juul Pedersen, Fleyr (liðskipari) 12 Brian Kærsgård Poulsen, ÍF Bárður Bendix Mikkelsen, venjari Ragnar í Haraldsstovu, hjálparvenjari Morten Månsson, fysioterapeutur Jan Hentze, liðleiðari 2013 . . . . . . Nummar 4 2011 . . . . . . . . . . Silvur 2009 . . . . . . Nummar 5 2007 . . . . . . . . . . Silvur 2005 . . . . . . . . . Bronsa 2003 . . . . . . . . . . Silvur 2001 . . . . . . Nummar 4 1999 . . . . . . . . . Bronsa 1997 . . . . . . Nummar 5 1995 . . . . . . . . . Bronsa 1993 . . . . . . . . . Bronsa 1991 . . . . . . . . . Bronsa 1989 . . . . . . . . . . . Gull 1987 . . . . . . . . . . Silvur 1985 . . . . . . . . . Bronsa Úrslit á oyggjaleikum