fríggjadagur 3. juli 2015síða 11

Fríggjadagur 3. juli 2015 sosialurin 75 11 Skrollar tú gjøgnum tína Facebook síðu sært tú javnan myndir av øllum handaslag, men seinastu dagarnar hava myndirnar fingið ein litríkari dám. Ælaboga litirnir hjá samkyndu rørsluni kring knøttin er at síggja á nærum hvørjari profilmynd. Barbara Holm Fyri stuttum gjørdi hægsti rættur í USA tann úrskurð, at tað framyvir er lógligt hjá samkyndum at giftast í øllum 50 statunum í USA. Hetta hevur givið afturljóð kring knøttin, og í USA hevur veitslan eisini sett sín dám á. Hvíta Húsið í Washington, statsbygningar í so at siga øllum statum, flogfeløg, ja óteljandi stórar fyritøkur, almenn arbeiðspláss og mangt annað hava latið ælabogalitirnir dansa eftir húsaveggjunum, fyri at sýna stuðul og gleði um nýggju rættindini hjá samkyndum. Á Facebook og Twitter skrivaði Hvíta Húsið "Amerika eigur at vera errin. #LoveWins" Kring knøttin hevur avgerðin givið afturljóð. Í størri og minni býum kring Evropa hava fólk leitað út á gøturnar við ælaboganum fremst, fyri at hátíðarhalda hendan stórsigur í USA. Sosialu miðlarnir sýna stuðul Facebook hevur gjørt eina lætta og ómakaleysa funku, har bert eitt klikk gevur tær tína profilmynd í ælabogalitum, fyri at sýna stuðul og gleði um avgerðina í USA. Yvir 26. milliónir fólk hava nýtt høvið at stuðla amerikonsku avgerðini umvegis Facebook, og yvir 6 milliónir hava á Twitter sýnt stuðul við at skriva #LoveWins ella #Pride. Mark Zuckerberg, ein av stigtakarunum av Facebook skrivaði á sína síðu, at -Amerika varð stovnað við tí lyfti, at øll menniskju eru skapt á jøvnum føti, og í dag tóku vit enn eitt fet í royndini at liva upp til okkara lyfti. Hann fegnaðist samstundis um, at kærleikin umsíðir sigraði í USA, og um tey mongu fólkini, sum nú hava somu rættindini sum onnur. Og júst hansara hugsan um evnið er helst ein orsøk til, at Facebook er á tremur við ælaboga profilmyndum - eisini her í Føroyum. Í hesum máli hevur Facebook tikið støðu, og gjørt tað ógvuliga lætt og ómakaleyst hjá brúkarum at stuðla átakinum aktivt. Tað krevur í veruleikanum bert eitt klikk. Og úrslitið er, at yvir 26. milliónir fólk - eisini mangur føroyingur - hava stuðlað Facebook átakinum til frama fyri javnrættindi hjá samkyndum. Føroyar í ælabogalitum í eina viku Ársins Faroe Pride verður í ár størri enn nakrantíð, og varðar eina heila viku. Byrjað verður við at hita upp við fleiri fyrilestrum, filmsvísing, hugnakvøld og stórum dragshowi í Norðurlandahúsinum. Síðan endar vikan við einum braki 27. juli 2015, tá stór almenn skrúðgonga og ókeypis konsert við Enekk, Dennis Agerblad Band, Hulda, Dánjal á Neystabø og Ævintýrferðin, Konni Kass og Terji Krossteig Messell & vinum eru øll á skránni. Faroe Pride er árliga tiltakið, har samkynd, tvíkynd, tvørkynd og teirra hinkyndu stuðlar, fáa møguleika at gera vart við seg, vísa at tey eru til, og at tey eru errin av at vera til. Hetta er samstundis eitt tiltak, ið heiðrar ymisleikan hjá øllum føroyingum, og setur fram ynski um eitt rúmligari Føroyar, har líkarættur er galdandi fyri allar borgarar. Upphiting í Norðurlandahúsinum Vikuskiftið 24. og 25. juli verður Norðurlandahúsið vent á høvdið. Við bæði gaman og álvara verður kynssnaring fyri fyrstu ferð í Føroyum sett á dagskránna. Orð og fyribrigdi so sum tvørkynd, dragqueen, transvestitt, intersex, queer, dragking, crossdresser, kynsligur samleiki og sannføring fara at fáa eina sakliga, virðiliga og undirhaldandi viðgerð. Skrúðgonga og ókeypis familjukonsert Mánadagin 27. juli er tíð til sjálva Faroe Pride skrúðgonguna. Eins og undanfarin ár, fer mannamúgvan at hoyrast og síggjast aftur, og ætlanin er veruliga at seta lit á Havnina henda seinnapartin í juli. Skrúðgongan er ikki einans ætlað LGBT-limum, men øllum føroyingum, ið ynskja eitt rúmligari og meira fjølbroytt samfelag, sum gevur pláss og javnrætt til allar sínar borgarar. Byrjað verður við Gunda­dals­ høllina, og síðan verður gingið oman gjøgnum miðbýin, har endað verður niðri á Skálatrøð. Har verður skipað fyri stórari ókeypis konsert og familjuvinarligum undirhaldi. Tey luttakandi á ársins konsert verða: Enekk, Dennis Agerblad Band, Hulda, Dánjal á Neystabø og Ævintýrferðin, Konni Kass, og Terji Krossteig Messell & vinir. Ymiskar røður verða eisini á skránni. Tey vitjandi fáa somuleiðis møguleika at njóta stóra tivoliøkið hjá Tórshavnar Ítróttaráð á Skálatrøð, sum aftur í ár verður sett upp til ólavsøkuna. Kelda: lgbt.fo - les meira á heimasíðuni