hósdagur 30. juli 2015síða 22

Fríggjadagur 31. juli 2015 sosialurin 86 22 Hvussu smakka Føroyar? Vit á Kunningarstovuni í Nólsoy vóru so heppin at sleppa uppí part, tá ið umhvørvisstuðulin hjá Tórshavnar Kommunu var latin fyrr í ár. Spurningurin Hvussu kunnu Føroyar smakka? kann sigast at vera grundin í arbeiðinum.  Tjóðhild Patursson E Eitt tað stuttligasta, fyri meg, við hesi verkætlanini eru tey nógvu góðu hugskotini og viðmerkingarnar vit fáa frá fólki. Nógv av viðskiftafólkunum á Kunningarstovuni her í Nólsoy vita eina rúgvu um plantur, nógv meira enn eg, og geva okkum nógv góð ráð; og samrøðurnar okkara millum snúgva seg meira og meira um plantur. Deiligt. Blívið endiliga við. Hitt seinast var kjakið um hvar bótarurtin veksur best. Bótarurtin er vanliga ógvuliga løtt at hava í havanum. Hon veksur væl og gerst ógvuliga stór, men eg setti bótarurt niður í fjørð og hóast tað var eitt gott summar, so vaks hon einki serligt, og í ár stendur enn verri til. Samandrátturin frá teimum ráðunum eg havi fingið man vera, at hon veksur væl, men má hava lívd. Eg fari at flyta mína á eitt betur vart stað - at hon stendur í skugga ein part av degnum sigst ikki at vera ein trupuleiki, men vindin leggur hon einki; og hann er nógvur av her í Krákuni í Nólsoy. Eg gleði meg at fáa meira bótarurt í næsta ár, tí vit brúka eina rúgvu í matgerðini á Kunnungarstovuni, so nógv at eg ofta má fáa bótarúrt frá pápa úr Havn við Ternuni. Takk pápi.  VIÐMERKING:  Eg veit at summar misskijingar hava verið um hvør ger uppskriftirnar vit seta í blaðið. Onkur heldur at eg havi gjørt alt, og tað er púra skeivt. Anna Malan Jógvansdóttur, verkætlanar­leiðari á Plantuverkætlanini, eigur flestu uppskriftirnar; eg eigi nakrar, og nógvar hava vit øll á Kunningarstovuni verið við til at skapað. Vit eru ógvuliga glað fyri at sleppa at deila hugskotini við tykkum, og vit vóna at tað sum einaferð byrjaði sum ein tanki í einum høvdi, kann geva íblástur til nógva góða matgerð og nógv nýggj góð hugskot. Og tit eru sjálvsagt hjartaliga vælkomin at senda okkum á Kunningarstovuni í Nólsoy hugskot og viðerkingar um plantur í Føroyum; ella tit støkka inn á gólvið. BÓTARURT Myndir:Tjóðhild Patursson Bótarurt hevur, sum navnið bendir á, verið brúkt nógv í bót - at bøta um smakkin, kann man kanska siga. Eg ímyndi mær at føroyskur matur einaferð hevur smakka nógv meira av bótarurt, nógv meira enn nú. Eg havi ikki sæð bótarurt vaksa vilt í Føroyum, men hon er ógvuliga vanlig í urtagarðunum. Eg veit hvussu leingi bótarurtin hevur verið brúkt í Føroyum, og eg kenni einki til søguna um nær og hví hon er komin til Føroya, og hvør man upprunaliga hava tikið hana við sær? Kanska onkur vitjandi í Nólsoy fer at fortelja mær eittsindur um tað seinni í sumar. Tað vóni eg. Bótarurtin smakkar eittsindur sum kardemumma, men meira urtakent. Eg ímyndir mær at bollar við bótarurt høvdu smakkað væl, eittsindur sum kardamummu-bollar, men ‘grønari’. Kanska eg fari at royn tað til næsta føðingardagin. Eg trúgvi eisini at hon hevði hóska seg væl í dessertum - í smáum mongdum. Tað ætli eg mær eisini at royna. Einaferð í framtíðini. So nógvar ætlanir og so nógvir dreymir. Gott at lívið er langt.