hósdagur 30. juli 2015síða 23

Fríggjadagur 31. juli 2015 sosialurin 86 23 FISKAPAKKAR VIÐ BÓTARURT Vit hava leingi arbeitt við eini bíligari og meira gerandisligari útgávu av vælumtóktu fiskapakkunum vit servera til døgurðar á Kunningarstovuni í Nólsoy. Hugskotið til fiskapakkarnar við eplum og bótarurt er sprottin úr kærleikanum hjá Onnu Maluni fyri eplum. Vit vóna at kunna at byrja at servera pakkarnar fyri nólsoyar- vitjandi seinni í summar. Men, sum vit so ofta taka til her í summar: So nógvar ætlanir og so nógvir dreymir. Gott at lívið er langt. Verður tað ikki í ár, so verður tað í næstaár. Til fýra pakkar: 1 kg av saltsprongdum toskaflaki við skræðu.  8 stór epli 4 hvítleyksfet 2 stórir nevar av hakkaðari bótarurt 2 stórir nevar av hakkaðum turkaðum ella feskum hvannbløðum Olja Sker fiskin í fýra pettir. Legg fiskapattini á hvør sítt bakipappír. Hakka eplini og hvítleykin smátt. Vend við olju, hakkaðu bótarurtini og hvonnini (onkuntíð koyra vit eisini arva í, fyri at fáa meira grønt). Bind band um fiskapakkarnar og grilla á grillini í ca 15-20 min. Ella í ovninum, tað tekur eittsindur longri tíð. Serverað við súróma (kanska við enn meira hakkaðari bótarurt?). Smakkar óiva væl við eittisndur av sitrón eisini. BÓTARURTASALT Tað ber væl til at turka bótarurt, men eg haldi at ein partur av smakkinum hvørvur, sum við so nógvum øðrum urtum. Anna Malan hevur gjørt okkum á Kunningarstovuni bótarurtasalt, og eg haldi at smakkurin verður nógv betur varveittur soleiðis. Koyr salt og bótarurt í hvirluna. Nógv salt og nógva bótarurt. Hvirla til grønt salt. Um tað er ógvuliga vátt er gott at turka tað eina løtu. Í einum tummum lagi á eini bakiplátu. Á borðinum ella við lágum hita í ovninum. BÓTARURTAPOPPKORN Ger poppkorn sum vanligt. Í eini grýtu. Ella í mikroovni - tá við einum pakka uttan salt. Kór bótarurtasalt útyvir poppkornini. Mær dámar væl at koyra eittsindur eyka av turkari bótarurt omanyvir. So smakkar tað enn meira av bótarurt. Eg vóni at vit fáa høvi at servera bótarurtapoppkorn á ovastevnu, og kanska eisini við hvonn. Men vit fáa at síggja um orkan strekkjur til. Annars verður tað í næstaár. Ja, tað er gott at lívið er langt. TIPS: Eg havi hoyrt (Aftur frá einum av okkara viðskiftafólkum. Takk!) at bótarurta-te við sitrón smakkar væl, og at tað er gott ímóti forkølilsi. Eg havi enn ikki roynt tað, tí eg havi verið so heppin at sleppa undan forkølilsunum í summar, men tað fari eg heilt víst at royna í vetur.