mánadagur 14. september 2015síða 30

Mánadagur 14. september 2015 · Nr. 105 30 Sosialurin Hugskot og viðmerkingar – send sms til 225000 ítróttur nýggjar tíðir í B36 Liðformaðurin og hjálparvenjarin gevur nýggja B36 venjaranum stóran heiður fyri, at tað loksins eydnaðist at vinna FM tvey ár á rað Jóannes Hansen Hetta FM heitið er ikki bara vunnið av venjaranum og spæl­arunum. Tað eru so nógv fólk í felagnum og kring liðið, sum gera eitt stórt og ósjálvsøkið arbeiði. Hesi hoyra vit ikki so nógv um, men hesi eiga stóran lut í, at tað loksins eydnaðist B36 at vinna FM tvey ár á rað, og at tað upp á stutta tíð er eydnast at endurreisa felagið, sum nú er væl fyri bæði á ein og annan hátt. Soleiðis sigur 35 ára gamli Jákup á Borg, sum í gjár vann FM fyri sjeyndu ferð. Hann er hjálparvenjari og liðformaður, og leygardagin 3. oktober fer hann at taka ímóti FM steypinum í Fløtu­ gerði í Fuglafirði. Í gjár vann B36 FM fyri 11. ferð, og fyri Jákup og øll onnur í felagnum er hetta nakað heilt serligt, tí hetta er fyrsta ferðin yvirhøvur, at B36 vinnur FM tvey ár á rað. – Næsta ár fyllir felagið 80. Nú hava vit skrivað søgu við at vísa, at tað ber til hjá B36 at vinna FM tvey ár á rað, og eg ivist ikki í, at hetta fer felagið at megna umaftur og umaftur. Tað er sera hugaligt, at tað eru so nógvir, sum eru uppvaksnir í felagnum, sum eiga lut í FM heitinum. Tað er aðalmálið. Ivaleyst verður tað eisini í framtíðini, at vit fáa onkrar profilar aðra staðni frá, sum vit nú hava í Tórði Thomsen, Lukasz Cieslewicz og Hans Paula Samuelsen, men eg haldi eisini, at vit duga væl at slúsa nýggjar menn inn á liðið, sigur Jákup á Borg, og hann heldur fram: – Tað snýr seg um at hava tol og at geva ungum monnum møguleikan at vinna sær sjálvsálitið, sum er avgerandi, um tú skalt avrika. Vit hava fleiri dømi um spælarar, ið eru komnir fyri seg hjá okkum, eftir at teir hava kent seg vera dumpaðar aðrastaðni. Teir hava tikið við ábyrgd, og tað er hugaligt, at tað riggar. Jákup á Borg hevur skriv­ að undir sáttmála fyri kom­ andi ár. Hann hevur tó einki ímóti, um tað vísir seg, at hans­ara leiklutur á vøllinum verður minni, enn hann higartil hevur verið: – Fótbóltsaldurin kemur ikki einsamallur. Tað er neyðugt við alt meiri hvíld, og sannlíkið fyri skaðum økist. Í ár hava vit sæð, at fleiri ungir hava verið við til at vinna, og eg havi avgjørt einki ímóti at taka meg aftur, meðan teirra lutur verður størri. Soleiðis eigur tað at vera. Meistaraheitið ber við sær, at B36 annað árið á rað fær flyting frá UEFA upp á meiri enn tríggjar milliónir krónur. Tað verður millum annað sipað til fíggjarliga partin, tá ið tað verður tosað um endurreisn av felagnum. Avbjóðingin Tá ið B36 vann tíggjunda FM heitið fyri einum ári síðani, var Sámal Erik Hentze venj­ ari. Eingin hugsaði nakað ann­að, enn at Sámal Erik eisini í 2015 fór at standa á odda, tá ið B36 fór at gera enn eina roynd at vinna FM tvey ár á rað. Tí kendist tað sum ein bumba, tá ið Bagge boðaði frá, at hann orsaka av arbeiði ikki hevði møguleika at halda fram í B36. B36 vildi hava ein lut­ fals­liga ungan venjara, sum passaði væl saman við spæl­arunum og felagnum í síni heild. Teir valdu Eyðun Klakstein, sum stutt framman­undan hevði fingið at vita, at hann ikki fekk høvi at halda fram í barn­dóms­ felagnum í Klaksvík, har hann miðvíst var farin undir at mynda lið við spælarum, sum hann sjálvur hevði lært upp, og har hann hevði valt útlendsku spælararnar – Jonas Flindt Rasmussen og Ndende - sum framvegis eru í felagnum. – Eg var í Havanna á Kuba, tá ið sms boðini komu frá B36. Ivaleyst er størsta trýstið at vera venjari í Klaksvík, bæði tá ið tað gongur væl og minni væl, men eg kendi hetta vera sera spennandi avbjóðing og stór ábyrgd saman við góðum hópi. Tað var skjótt, at vit skrivaðu undir sáttmála, og hetta hevur verið eitt framúr ár. Vit hava bara tapt ein dyst. Tá ið tað hevur verið tætt og spennandi, er tað koppað okkum til fyri­ mun­ar soleiðis, sum tað er meistarum líkt, sigur Eyðun Klakstein. B36 venjarin hevur ikki verið so nógv at sæð í B36 húsinum og millum B36 viðhaldsfólkini: – Tað tekur sína tíð at koyra úr Klaksvík og suður í Gundadal og norðuraftur. Eg havi møtt í góðari tíð til venjingarnar og lagt síðstu hond á fyrireikingarnar, og tá ið venjingarnar eru av og prátini við spælarar, leiðarar og onnur liðug, havi eg koyrt norður aftur. Tað eru altíð viðhaldsfólk í B36 húsinum, og sjálvandi havi eg heilsað upp á tey eisini, men eg havi ikki kent ábyrgd fyri at vera leingi í húsinum. Tann partin av felagslívinum syrgja nevndarlimir og fleiri onnur fyri. Felagið riggar framúr væl. Venjarin nýtist ikki at hava fokus á øðrum enn at venja. Um tað er okkurt, sum skal gerast ella fáast upp á pláss, so hevur formaðurin, Heiðrikur Christiansen, sum alla tíðina er um okkum, ella onkur annar syrgt fyri tí, áðrenn hálvtalað er orð, sigur B36 venjarin. Arbeiðsbýtið B36 meistaraliðið í 2015 líkist nógv liðnum, sum vann FM í fjør. Onkrir spælarar hava verið langtíðarskaddir. Nú meistaraheitið, sum leingi hevur verið ávegis, endaliga varð staðfest, er tað bara mið­verjin Hørður Askham, sum er skaddur. Tí er upplagt at siga, at hetta hevur gingið av sær sjálvum, og at uppgávan hjá nýggja venjaranum hevur verið at halda tørn um tað, sum Sámal Erik Hentze hevði fingið at rigga. Tað vil hjálpar­venjarin Jákup á Borg ikki skriva undir uppá. – Eyðun kom í B36 við tí eyðmýkt, sum skal til, tá ið tingini rigga. Hann vísti ikki trongd til at kollvelta øllum og harvið at vísa, at tað bara var hann, sum setti dagsskránna. Men hann hevur dugað framúr væl at tillaga liðið og spælið. Eingin kennir betri føroyskan fótbólt, enn Eyðun ger, og hann hevur fingið Jóhan Thomsen við sær úr Klaksvík at taka allar dystirnar hjá okkum upp. Eyðun er sera professionellur og miðvísir, altíð væl fyrireikaður og veit, hvussu vit skulu spæla okkara spæl, og hvussu vit skulu taka ímóti mót­støðu­ liðunum, sigur Jákup á Borg. Og hvør er so leikluturin hjá tær? – Eyðun eigur venj­ing­ar­ nar, taktikkin, dystar­fyri­ reik­ingina eftir­metingina. Mín lutur er at vera við til at byggja brýr millum spæl­ arar­nar og venjaran og so at seta futt í, tá ið vit eru í um­ klæð­ingarrúminum og skulu út at spæla dystirnar. Liðið 24 umfør eru avgreidd, og tveir spælarar hava verið við hvørja ferð – Hans Pauli Samuelsen og Odmar Færø. Tórður Thomsen, Høgni Eysturoy og Róaldur Jakobsen hava sitið uttanfyri eina­ferð. Hinir, sum hava spælt nógv, eru Andrias Eriksen (22), Eli F. Nielsen (21), Lukasz Cieslewicz og Gestur B. Dam (20), Jákup á Borg (18), Hanus Thorleifsson (17), Ibrahima Camara og Benjamin Heinesen (16), Hørður Askham (12) og Árni G. Nielsen (11). Eyðun Klakstein rundar soleiðis av: – Tað hevur verið framúr, at spælararnir hava tikið av møguleikanum, tá ið hann hevur verið har. Andrias Eriksen, Eli F. Nielsen og Gestur B. Dam vóru undan kappingarbyrjan neyvan roknaðir at eiga lykla­leik­ lutir, men teir stóðu seg væl, tá ið tað var brúk fyri teimum. Jónas þór Næs og Alex Mellemgaard vóru langtíðarskaddir. Tá ið vit mest høvdu brúk fyri teimum, vóru teir tøkir aftur, og teir vístu seg at vera væl fyri. Og so eru tað hinir, sum hava verið týdningarmiklir undir venjing, og tá ið teir hava fingið møguleikan. Her hugsar venjarin um Philip Lund (4), Trygva Askham (2), Robert Heðin Brockie (2), Pætur Petersen (2), Rasmus Dan Sørensen, Bjarna Petersen og Karl Martin Danielsen (1). Tað eru nýggjar tíðir í B36, sum í gjár fyri fyrstu ferð tryggjaði sær FM annað árið á rað, og sum nú hevur vunnið ellivu FM heiti. joannes@sosialurin.fo