hósdagur 22. oktober 2015síða 29

FRÍGGJADAGUR 23. OKTOBER 2015 SOSIALURIN 122 29 Ofta eru vit vitni til, at tónleikarar hava ført tónlistaliga arvin víðari til nýggja ættarliðið. Hetta er eisini galdandi fyri Døgg Nónsgjógv, ið misti pápa sín sum átta ára gomul. Nón er ognað pápanum og vísir okkum, at gott er lagt í beini hjá ungu songkvinnuni SIGURJÓN EINARSON F yri ikki so langari tíð síðani gav Elinborg Pálsdóttir eina EP út, ið handlaði um sorg og tað at sakna. Níggj­unda oktober í ár kom enn ein persónlig fløga út frá ungari songkvinnu – hesuferð frá Døgg Nónsgjógv, sum eisini er ognað pápa sínum, og har sorg og kærleiki eru í miðdeplinum. Báðar útgávurnar eru sera persónligar og vísa okkum, at hesar báðar songkvinnurnar ikki eru bangnar fyri at vísa sínar kenslur, ið eldri ættarlið tykjast hava havt tað heldur truplari við. Báðar útgávur vitna um, at okkara ungdómur virkar til at vera væl fyri, tá sjúka og deyði kunnu raka einstøku familj­urnar, og at hjálp verður veitt teim­um, tá ið sorgin nívir. Hetta eiga sjálv­hjálpar­ bólkar her á landi, sum eitt nú Berin, sín lut í, at veita teimum ungu tey røttu amboðini at loysa trupulleikar, ið kunnu standast av sorg, umframt at familjur eisini eru blivnar betri at tosa um sorg og sakn, har tað fyrr heldur var tøgnin, sum valdaði. Fyrsta fløgan hjá Døgg Nónsgjógv ber heitið »Nón«, og fevnir um glaðari eins og stillari løg í singer/songwriter og popp sjangruni, har stílurin er í tráð við sangirnar »Tú Tók Mína Hond« og »Tú Ert Hjá Mær«, sum vit longu kenna frá Døgg, har serliga fyrra lagið hevur verið nógv at hoyrt í loftmiðlunum, har blaðunga stjørnu­skotið av Innan Glyvur átti ársins besta poppsang í 2014, tá hon varð heiðrað FMA-heiðurslønini fyri at hava skrivað ársins sang í "Popp bólkinum" fyri sangin »Tú Tók Mína Hond«. Til hesar sangirnar á útgáv­ uni, hevur Døgg sungið røddirnar inn av nýggjum, har røddin nú ljóð­ar meira innilig og tilvitað við djúpa og kremuta ljóðinum. Hetta kemur ser­ liga til kennar í báðum áður­nevndu sangum, eins og vit hoyra tað í sang­ unum »Mánin«, »Blá Tár« og seinasta lagið á fløguni »Túsundtals Ár«, ið Uni Arge hevur skrivað bæði orð og tekst til, og sum hann áður hevur givið, men sum Døgg hevur fingið loyvi til at geva út á nýggjum, har hon sjálv syng­ur. Hesin sangur hevur havt nógv at týða fyri hana, tí hetta var ein sangur, ið Birgir dámdi sera væl og sang hann ofta. Í hesari útgávuni, ið Døgg kemur sera væl frá, hevur Jens L. Thomsen sera hegnisliga innsett gittarspælið frá pápanum, sum er upptikið á jólum 2003, knapt eitt ár innan hann doyði. Ein sera passandi sangur at enda fløguni við, skal sigast. Tekstirnar á fløguni hevur Døgg skriv­að út frá sorg og kærleika, og fløgan er ognað pápanum, Birgiri Nónsgjógv, ið javnan var at hoyra í útvarpinum og til ymiskar sam­ komur, har hann – ofta saman við øðrum gjáarmanni, Jónsveini Olsen, á skemtiligan hátt framførdi fólks­ ligar sangir við gittara og sangi. Fløgan er upptikin og ljóðblandað av Jens L. Thomsen í Støkumørk, Innan Glyvur, og mastrað av Matt Colton á Alchemy Mastering í London. Afturat Døgg, eru Drós R. Joensen, Hans Jacob Kollslíð, Allan Tausen, Jens L. Thomsen og Marius Ziska við á fløguni, har tey bæði fram­føra frálíka lagið »Ongi Orð«, ið nokk verður nógv at hoyra í komandi tíðum. Til tíðir hoyra vit onkursvegna pápan, Birgir Nónsgjógv, aftur á fløguni. Stílurin minnir til tíðir nógv í form av kassagittaranum, ið var eyðkendur fyri tónleikin hjá Birgiri, har gittarspæl og rødd hava eitt tætt samanspæl. Hetta kemur serliga til kennar í sangunum »Tú Og Eg« og »Ringrásin«, ið hevur eitt lætt og positivt lyndi yvir sær, hóast tekst­ urin endurspeglar tankar um til­ veruna. Útgávan er í síni heild rættiliga melankólsk, men samstundis eisini positiv á lyndi, har útgávan ber bráð av, at Døgg er komin eitt stig víðari við sorgini, og sostatt kann nýta hana sum ein afturlýtandi lut, tá hugt verður frameftir. Stillisliga og djúpa røddin hjá Døgg kann til tíðir ljóða heldur einsljóðandi á útgávuni, men í »Ongi Orð« sleppur røddin veruliga út at spæla – í góðum samljóði við røddini hjá Mariusi Ziska. Við átta sangum á áleið tríggjar minuttir fyri hvønn sang, ið tilsamans geva okkum einar 24 minuttir av tónleikaframførslu, er útgávan heldur stutt. Tað hevði kanska verið meira passandi við tveimum-trimum sangum afturat, men so skuldu hesir sangir passa til fløguna og ikki bert verðið ífylla. Í síni heild kemur Døgg væl frá síni fyrstu útgávu »Nón«, ið eg rokni við rakar breitt í føroysku fólkasálini. Samstundis kunnu vit eisini gleðiliga ásanna, at tónlistarligi arvurin eftir Birgiri Nónsgjógv verður borin víðari og eg ivist ikki í, at hann hevði verið sera errin av dóttrini. Hóast útgávan fær tríggjar stjørnur av fimm, so ivist eg ikki í, at her er meir í væntu frá Døgg. Hetta er bert byrjanin á hennara tónleikaferð. TÓNLEIKUR INNILIGI TÓNLEIKAARVURIN EFTIR BIRGIRI NÓNSGJÓGV ★★★★★ Ummæli