hósdagur 10. desember 2015síða 21

FRÍGGJADAGUR 11. DESEMBER 2015 SOSIALURIN 143 21 Jógvan Joensen hevur givið sína fyrstu útgávu út, har hann vil vísa okkum á, at hann nú stendur á egnum beinum og er komin víðari frá donsku sjónvarpskappingini SIGURJÓN EINARSON J ógvan Joensen ella Jógvan frá X-Factor, sum mong kenna hann, er úti við nýggjari útgávu, ið nevnist »Love That You Love«, sum samstundis er hansara fyrsta útgáva. Talan er um eina EP við fimm løgum, ið øll eru gjørd av Jógvani sjálvum – har fýra løg eru á enskum og tað eina á føroyskum. Við nýggju útgávuni gevur Jógvan okkum innlit í, hvat veruliga býr innan í honum. Her eru fimm sera inniligir sangir, har Jógvan borðreiðir við atmosferiskum popp- og soultónleiki, ið hevur ein feril av elektróniskum huglagi yvir sær. Fyriuttan Jógvan, hevur hann fingið hjálp frá Mariu Ljósá, ið syngur duett og kór, Andrias Tykjær Restorff á sello, Mikael Blak á bass og Høgna Lisberg á trummum og øðrum ljóðførum, umframt at hann eisini hevur verið framleiðari á útgávuni. Miksað hevur Jens L. Thomsen, meðan Glenn Schick hevur mastrað. Tað er Tutl, ið gevur EP-ina út. X-Factor er yvirstaðið Vit komu at kenna Jógvan gjøgnum donsku X-Factor kappingina, har hann endaði á einum flottum øðr­ um plássi. Hetta upplivilsið frá kapp­ingini hevur hann brúkt sum kær­komnan lærdóm, nú hann gevur egið tilfar út. Sjálvur sigur Jógvan í tíðindaskrivi, at hann hevði ein tanka um at vera seg sjálvan í kappingini, men at í einari tílíkari kapping er alt handritið skrivað áðrenn, og tí er tað ikki lætt at vera seg sjálvan í kappingini, tá alt verður gjørt til undirhald fyri sjónvarpshyggjaran. Tí vil hann við nýggju útgávuni vísa á, at hann nú stendur á egnum beinum, har hann hevur sagt farvæl til Jógvan frá X-Factor. Og tað er júst hetta, ein leggur merki til, tá ein hoyrir EP-ina hjá Jógvani. Har tykist at mangla eitt lag, nevniliga sangurin, hann framførdi til finaluna í X-Factor kappingini, »Best Kept Secret«, men tað er ikki við á útgávuni, og tað kann tulkast sum um, at Jógvan tekur frástøðu frá kappingini, ið gav honum møguleikan at vísa á sínar framúrskarandi tón­ lista­gávur at framføra sangir á hægsta støði. So til tykkum, ið væntað tykkum tónleik frá X-Factor Jógvan, tit verða nokk skuffaði, tí við nýggju útgávuni vísir Jógvan okkum á, at kappingin er liðug, nú er tað Jógvan, Jógvan (!), ið kemur fram við sínum egna tón­leiki. Hetta syngur hann sjálvur um á útgávuni, har »Gloym meg ei« handlar júst um eftirtíðina eftir donsku sjónvarpskappingina, har Jógvan – við X-Factor blues – syngur um, hvussu hann ætlaði at kappingin skuldi verða fyri hansara part, men har hann samstundis eisini ber ótta fyri, at hann nú bara verður eitt ann­ að ørindi í einum framhaldandi sangi. Ov nógv óljóð Í síni heild er útgávan sera innilig, har Jógvan ikki pakkar nakað inn, men kemur út við sínum kenslum, og tað kemur hann í flestum førum væl frá, tá ið fantastiska røddin ikki druknar í alt ov nógvum óljóði, ið tykist at hava fingið ov stóra rúmd á EP-ini. Alt ov ofta kemur sermerkta og framúrskarandi røddin hjá Jógvani at standa í bakgrundini av effektum og kórsangi, og kemur sostatt ikki til sín veruliga rætt, har hon heldur átti at vera berandi fyri løgini. Hetta hoyrist m.a. í »Hope and Laughter«, ið er ein nýggj innspæling av lagnum, ið áður hevur verið at hoyrt á eitt nú YouTube. Nýggja útleggingin hevur fingið ein meira myrkari dám yvir seg, og tað er eisini fínt, men her er ov nógv yvirdoyvandi ljóð á, ið yvirtekur leiklutin hjá sermerktu røddini, sum mestsum druknar í ljóðeffektum. Tá er eldra útgávan meira innilig og heldur betri, um ikki nógv betri. Eisini sakni eg at verða bergtikin av løgunum á útgávuni. Har eru ov nógv innantóm orð og ov nógv vanliga nýtt myndatala í tekstunum. Eg hevði sæð fram ímóti at verði bergtikin, eins og Jógvan bergtók disko drotningina, Line Rafn, tá hann tulkaði sangin hjá Jeff Buckley »Love, You Shold´ve Come Over«, har ein framúrskarandi góð rødd og eitt klaver í bakgrundini blæsur hana mestsum um koll. Tá er tað, at røddin og Jógvan veruliga koma til sín rætt, og tí er tað óskiljandi fyri mær, hví tað ikki er røddin, ið er í miðdeplinum. Øll kunnu ljóða hampiliga væl, um alt verður framleitt í studio og onnur ljóð koma yvir sangin, men tá tað er sangurin og røddin, ið er tað mest sermerkta fyri ein tónleikara, so haldi eg, at tað er hetta, sum eigur at skara framúr, og tað ger tað alt ov lítið á hesari útgávu, tíverri. Tað, ið sermerkir Jógvan, nýtist ikki nakra hjálp frá nakrari sjónvarpssending ella nøkrum yvirdoyvandi bakgrundsljóði. Hann hevur eina heilt serliga rødd, sum ikki eigur at vera eitt fjalt loyndarmál, men heldur eigur at finna inn til sín sjálvan, har trúgvin á egna mátt og megi eigur at traðka fram og blása okkum øll um koll, tí tað kann Jógvan, um hann vil tað. »Love That You Love« fær tríggjar jólastjørnur út av fimm. TÓNLEIKUR FYRRVERANDI X-FACTOR STJØRNA Á EGNUM BEINUM ★★★★★ Ummæli