hósdagur 11. februar 2016síða 22

FRÍGGJADAGUR 12. FEBRUAR 2016 SOSIALURIN 18 22 Matgerð TJÓÐHILD PATURSSON Eg havi altíð havt tvíbýttar kenslur um Valentinesdag. Tað sigst at valentinesdagur er til minnis um eitt ella annað halgimenni. Valentinus æt hann nokk. Hann var halgimenni, millum annað tí at hann í loyndum gifti fólk, hóast keisarin ikki loyvdi tí – mundi eg kunnað blivið halgimenni, um eg byrjaði at víga samkynd, uttan at løgtingið loyvdi tí? Nei, skemt tilsíðis og sama veg við álvara. Í dag verður Valentinesdagur mest hildin tí at tað gera tey í »Amerika«, og einaferð var Amerika kul. Ella kanska hevur tað verið kul í fleiri umførum. Men tað er ikki serliga kul longur. Eg eri hvørki katolikk, amerikonsk, religiøs ella sjálv­ boðið amerikaniserað, og tí dugi eg ikki at skilja, hví eg skuldi hildið Valentines­dag. Hinvegin kennist tað so løgið at seta seg upp ímóti einum kærleiksdegi. Jú, vit »skulu« sjálvsagt elska hvønn dag – men hví ikki geva kærleikanum serligan ans einaferð um árið? Her í Svøríki kalla tey tað »Alla Hjärtans Dag«, og eg havi hoyrt, at tað í Finnlandi verður kallað »Vinadagur«. Tað ljóðar fitt, haldi eg. Ja, hví ikki nýta dagin til at gera okkurt serliga fitt fyri tey, vit eru góð við. Eg eigi eina fitta gentu, sum elskar spaghetti. Sunnudagin fær hon spaghetti og vit fara at hyggja at filmi, tí tað elskar hon. Hon elskar eisini endurtøkur. Heldig í hana, tí at longu týsdagin mátti eg gera hendan rættin og síggja filmin, ið rætturin sipar til – fyri at taka myndir sjálvsagt – so sunnudagin verður bæði spaghetti, filmur og endurtøka av týsdegnum. Góð eri eg við hana – ikki bara á Alla Hjartannadegi. Um tit vilja eta matin »Lady and the Tramp«-stíl og lata eitt spaghetti leiða tykkum til kossin, ella deila matin við vinir og familju; ja, so smakkar tað líka so væl – serliga tí at tú etur saman við fólki tú ert góð/ur við. Eg haldi tað er kul, at eitt av fronsku matráðunum er júst tað: »at eta saman við fólki« – tað fær næstan alt at smakka væl, ella í øllum førum betur. Fyri tíðina dámar mær so væl at brúka kakao í mati; og sjokoláta og kærleiki má vera samantvinnað onkursvegna, ha? Tí hóskar tað eyka væl til hendan romantiska rættin. Hugsa tær, at Walt Disney kláraði at gera nakað so barnsligt, sum spaghetti við kjøtbollum, til nakað so romantiskt sum »Lady and the Tramp«-spaghetti! Spaghetti við kjøtbollum – Til 4 svong fólk •  500 gram av hakkikjøti •  1 spsk av Dijon sinoppi •  1 spsk av kakaopulvuri •  1 egg •  1 tsk av salti •  pipar •  olivenolju •  1 dós av tomatum (umleið 500 gram) •  1 hvítleyksfet •  1/2 reyða kili •  10 basilikum bløð, umleið •  1/2 dl av reyðvíni •  1 msk av balsamico edikki •  1 tsk av salti •  1 tsk av sukuri •  400 gram av spaghetti Rør sinopp, egg, kakaopulvur, salt og pipar saman í einum bolla. Koyr hakkikjøtið í og rør alt saman. Forma umleið 50 smáir kjøtbollar við deigginum – ella nakrar færri størri, um tær dámar tað betur. Legg kjøtbollarnar í køliskápið. Hita olivenolju í eini stórari grýtu. Pressa hvítleykin og hakka kili. Skeik tað í oljuni. Tá ið hvítleykurin hevur fingið lit, koyrir tú basilikumbløðini og tomatirnar í grýtuna. Lat koma uppá kók, og kóka á miðalhita í umleið 10 minuttir. Koyr síðani vín, balsamico edikk, salt og sukur í. Set á lágan hita og lat tað smá bløðra undir loki. Kóka síðani spaghetti eftir vegleiðingini á pakkanum. Meðan hitar tú eitt sindur av olivenolju á eini stórari pannu. Steik kjøtbollarnar á pannuni, tað tekur umleið 5 minuttir. So hvørt sum kjøtbollarnir verða liðnir, kanst tú koyra teir í grýtuna við tomatsósini. Tá ið spaghettiið er liðugt, hellir tú vatnið frá, men goymir 1 dl. Koyr síðani spaghetti í grýtuna við tomatsós og kjøtbollum. Koyr eisini 1 dl av kókivatninum í grýtuna. Set nú á høgan hita og rør runt í grýtuni – bara ein góðan minutt. Hetta blandar saman spaghetti og tomatsósina. Nú er klárt at servera. Parmesanostur smakkar væl at ríva útyvir. Rætturin riggar serliga væl at eta saman við børnum frammanfyri Disney- filminum »Lady and the Tramp«. Spagetti-kossurin: Vælkenda senan frá »Lady and the Tramp«. Filmurin ið gjørdi spagetti við kjøtbollum romantiskt – í øllum førum eitt sidnur romantiskt! Matur saman við fólki tú ert góð við gagnast betur Minnst til at keypa okkurt gott at drekka afturvið ALLA HJARTANNA­ DAGUR Spaghetti og kjøtbollar – skulu vit hittast á miðjuni til ein koss?