hósdagur 31. mars 2016síða 31

FRÍGGJADAGUR 1. APRÍL 2016 SOSIALURIN 37 31 Komandi partur Í komandi parti verður greitt frá bygdini innan Glyvur og um Andrew, áðrenn hann kom til Havnar. Í 1948 fór Andrew at koyra hýruvogn . Sama ár kom hann púra ósekur at gerast partur av eini flagggølu. Heimastýrislógin var beint sett í gildi og bylgjurnar gingu høgt millum politisku flokkarnar. Kendi sambandsmaðurin Andras Samuelsen var blivin løgmaður. Hetta var ikki væl dámt av sjálvstýrisvonginum. Talan var um ein vanligan leigutúr, har Andrew koyrdi Andras Samuelsen heim eftir eina jarðarferð. Hendingin er lýst í bókini »Auto« hjá Magnus Gunnarsson. Søgan byrjar við hesi grein í Dagblaðnum 15. juni 1948: Løgmaður beinir fyri føroyska flagginum Tað er ikki óvanligt at síggja bilar við einum lítlum flaggi framman. Nú ein dagin skuldi løgmaður hava bil, fólk sóu hann siga nakað við bilstjóran, ið síðan fór fram og tók føroyska flaggið av bilinum – tástani fór Andras Samuelsen inn í bilin. Sum løgmaður hevur Andras Samuelsen í hvussu er bundið seg til at virða flaggið, at hann ikki ger tað innast inni, vita vit. Hetta dømi sýnir best, at hann er so nógv ov lítil til sítt starv, at vera Føroya andlit út eftir. Var hann nóg stórur, hevði hann havt kenslur sínar hjá sær sjálvum og latið føroyska flaggið staðið í friði. Var hann ikki so lítil, sum hann er, hevði hann eisini lagt hitt danska bringumerki, hann gongur við, ta tíð, hann er løgmaður. Tað hevur ongan áhuga hjá okkum at vita, hvat Andras heldur um føroyska flaggið, men føroyingar mugu krevja, at hann sýnir tí ta virðing, sum landsins flagg hevur uppiborið. Ein so lítlan mann vilja vit ikki finna okkum í at hava til løgmann í Føroyum, og hinir báðir oddafiskarnir, Dam og Louis Zachariassen, ið siga seg hava gjørt so nógv fyri føroyska flaggið, teir eiga at siga seg leysan av slíkum vanvirðinsgerðum móti landsins flaggi – gera teir ikki tað, eru teir líka dánir. Í gjár síggja vit, at Dimmalætting skrivar um Ólavsøkuna 1930 og nevnir nakað um »gadeoptøjer«. Slík nøvn og verri, sum »Pøbel« hevur Dimmalætting altíð vita at heft á øll, ið hava við flaggstríðið at gera. Men eftir tí at døma, vit hava greitt frá frammanundan, síggja vit, at løgmaður kennir seg ikki ov góðan til at »blande sig med Pøbelen«. Dimmalætting svarar aftur 16.juni: Ein Dagblaðs lygusøga Fólkaflokkurin smæðist ikki at bera fram beinleiðis ósannindi Dagblaðið bar í gjár tey tíðindi út millum manna, at løgmaður, A. Samuelsen, noktaði at fara inn í ein bil, tí hesin hevði eitt lítið føroyskt flagg framman. Løgmaður bað bilmannin taka flaggið burt, og tástani fór A. Samuelsen inn í bilin. Henda roynd fólkafloksmanna at íbirta eina nýggja flagggølu fer kortini at miseydnast. Tí at søga Dagblaðsins er lygn, stutt sagt, frá enda í annan. Henda sama søga er einans ein av teim mongum skendsku og ónærisligu fólkafloksroyndum at spilla teir menn út, ið á lógligan hátt eru settir at stýra landinum. Til hesa útspilling tykist einki vápn at vera ov skitið. Skommin verður einans teirra, ið bera slík ósannindi fram. Væl gagnist teimum. Veruliga søgan um Andras og flaggið Andrew Djurhuus greiddi í Dagblaðnum 18. juni soleiðis frá tilburðinum: Hann koyrdi fólk til gravarferð og hevði tí hitt lítla pyntiflaggið á bilinum á hálvari stong. Andras hevði biðið um bilin fyri at verða koyrdur heimaftur úr kirkjugarðinum, og tá gravarferðin var yvirstaðin, helt hann (bilstjórin) tað ikki vera orsøk til at hava flaggið á hálvari stong og ... tók hann tað burtur av bilinum og – leggur bilførarin afturat – Andras Samuelsen bað ikki um at koyra flaggið burtur. Blaðið heldur áfram: Tað var óivað gleðiligt fyri Dimmalætting, at hon fekk høvið til at sleingja orðið »lygisøgu« eftir okkum. Hartil er at siga, at tá vit fara skeivir, eru vit so stórir, at vit vilja viðganga tað. Vit koma tí við omanfyristandandi frágreiðing – ikki fyri Andrasar skuld – men tí vit ikki vilja leggja bilstjóran undir nakað, sum hann sigur seg vera ósekan í, og sum vit kunnu prógva. Tað, sum sæð var, greiddu vit beint frá – og tað kann sjálvt ikki Dimma nokta fyri. Vit kenna annars ikki trongd til at geva Andras Samuelsen nakra umbering, men vilja harafturímóti halda fast um, at tað vit søgdu um hansara støðu til flaggið, var beint – tað er ikki nøkur lygisøga, at hann er beiskasti mótstøðumaður hjá føroyska flagginum og helst sær tað strokið – skuldu vit farið skeivir í tí, biðja vit Andras senda okkum eina váttan um, at hann er góður við føroyska flaggið og vil stríðast fyri rætt tess. Ger hann tað skulu vit seta hesa váttan hansara á 1. síðu. Vit vilja eisini fegin geva honum rúmd, um hann vil avnokta alt tað illa, hann hevur sagt um flagg okkara. Samstundis vilja vit eisini spyrja Dimmalætting, um hon vil kalla ta »lygn« vit hava sagt um bringumerki Andrassar løgmans. Bert partvís umbering Her endar frásøgnin. Hon lýsir væl politiska hugburðin tá í tíðini. Hóast søgan var grundað á eina misskiljing, so skal tað bert partvíst dragast í land. Og tann veruliga órættaði, løgmaður, fekk onga umbering. Andrew man neyvan hava dámað at vera drigin uppí hetta mál. Hann greiddi ongantíð sínum egnu frá hesi hending, sum var hend undan tíðini hjá Hervør. Stuðul hjá Petur í Gong Andrew var ein av stovnarunum av P/F AUTO í 1952 og bleiv ein av teimum fyrstu partaeigarunum. Hann sat í nevndini frá 1960-62 og frá 1973-79. Andrew koyrdi hýruvogn, til hann mátti gevast vegna sjúku. Andrew var leingi stuðul hjá Petur í Gong, sum í mong ár var óalmennur býarkongur í Havn. Hetta var ikki so løgið, teir vóru jú vinmenn frá ungum av, og familjurnar komu nógv saman. Andrew var fleiri ferðir á listanum hjá Petur til býráðsval, forrestin saman við Heðin Mortensen, sum byrjaði sína karrieru í býráðspolitikki hjá Petur í Gong. Andrew varð ikki valdur, men hann varð so varamaður. Einaferð í 1972 var brúk fyri varamanni og boð vórðu send eftir Andrew. Hann letur seg í klædning og fer oman í býráðið í Bringsnagøtu. Hann situr í gongini og bíðar, til teir hava atkvøtt um, at Andrew kundi taka sæti í býráðnum. Men so kemur onkur út til Andrew og sigur, at fundurin er avlýstur, tí boð eru komin um, at Fríðrikur kongur er deyður. Hetta var so tað nærmasta Andrew kom býráðsessinum! Men Andrew var valdur til lim í hegnsýnisnevndini fleiri skeið. Í 1977 var tað saman við J.L. Joensen og Børge Kristiansen. Henda nevndin skuldi ansa eftir, at hegn og garðar vóru í »seyðahøgum standi«, tá bøurin var friðaður fyri seyð um summarið. Hetta gav hesa tíðina nokk so fitt av arbeiði. Hervør í strúkirúminum á Zarepta Elsa og Pól Jóhan Andrew í Kristnastovu eftir eitt møti ANDREW Í FLAGGGØLU