týsdagur 3. mai 2016síða 56

SOSIALURIN MAI 2016 24 Hallur av Rana Tá næmingarnir í NámX í farnu viku pakkaðu taskurnar, og settu kósina móti Berlin, har fleiri dagar við vinskapi og undirvísing vóru á skránni í søguliga týska høvuðsstaðnum, vóru tað ikki allir næmingar, ið fóru við í flogfarinum. 17 ára gamla Jonna Maria Hansen sat nevniliga eftir í Føroyum. Ikki tí, at tað var ein ov stór fíggjarlig avbjóðing ella tí, at sjúka forðaði henni at fara. Men sum partur av kvinnuliðnum hjá Havnar Fimleikafelag mátti hon velja, um hon fylgdi klassanum til Berlin, ella um hon varð verandi í Føroyum, so hon kundi venja fram til og luttaka í Heimsmeistarastevnuna í fimleiki, ið verður komandi vikuskiftið. Hon valdi fimleikin framum náms­ ferðina, ið flestu skúlanæmingar gleða seg til í fleiri ár. Men fyri ungu havnar­ gentuna var tað ikki eitt óvanligt val. Tað er prísurin, um man ynskir at íðka estetiskan fimleik á hægsta støði í Føroyum, sigur Jonna Maria Hansen avgjørd á máli. BYRJAÐI SUM SMÁGENTA Longu sum trý ára gomul byrjaði Jonna Maria Hansen at íðka fimleik, og fýra ár seinni, tá hon var sjey ára gomul, tók hon stigið upp til estetiskan fimleik. Munurin millum estetiskan fimleik og vanligan fimleik er í stóran mun hvussu nógv tíð verður brúkt upp á fimleikin, greiðir Jonna Maria Hansen frá. – Fimleikur er einaferð um vikuna og er ikki líka krevjandi. Í estetiskum fim­leiki verður vant 4-5 ferðir um vik­ una, møtiskylda er til venjingarnar, og sum heild verður kravt meira av íðkar­ an­um. Tað sama verður gjørt í báðum, men støðið er ymiskt, sigur Jonna Maria Hansen. 9 TÍMAR UM VIKUNA Í dag er Jonna Maria Hansen 17 ára gomul, og hevur hesi níggju árini halgað seg til estetiskan fimleik. Gjøgnum árini hevur hon ment seg til ein av fremstu estetisku fimleikarum í Føroyum, og er í dag at finna á besta kvinnuliðnum hjá Havnar Fimleikafelag. Men tað krevur sítt at náa hægsta støðið í føroyskum fimleiki. – Eg venji fýra ferðir um vikuna. Tríggir ferðir verður vant tveir tímar um dagin, og tí einu ferðina venja vit tríggjar tímar. So í alt verður tað til 9 tímar um vikuna við síðuna av skúla, arbeiði og øðrum. Harumframt er ymiskar venjingar, so sum renning, ið vit sjálvar mugu gera. Fram til kappingar og tá íðkararnir hava feriu, verður tó vant eyka nógv. – Tá vit skulu gera okkum klára til eina kapping, ella tá vit hava feriu, so verður skrúvað upp fyri venjingini. Tá kunnu vit venja upp til tríggjar ferðir so nógv sum vanligt, sigur Jonna Maria Hansen. NEYÐUGT AT VELJA Jonna Maria Hansen dylur ikki fyri, at tað krevur nakað serligt, um man ynskir at fylgja dreyminum hjá nógvum ungum fólkum og gerast millum tey fremstu á sínum øki. – Tað krevur disiplin og at man setir tíð av til tað. Saman við skúlanum, so verður estetiskur fimleikur raðfestur hægri enn alt annað. Um man ynskir at náa málinum, so má ein vera klár at siga nei til hugnakvøld, ball og annað við vinfólkunum, sigur Jonna Maria Hansen og leggur afturat. – Eg havi akkurát sagt nei til at fara námsferð við klassanum til Berlin, tí eg skal við fimleikinum til Spania at kappast. Tað var ein tung avgerð, men tá man er við í hesum og kapping er á skránni, so má man velja nøkur ting frá. Í estetiskum fimleiki verður kappast í liðum, so tað merkir, at um ein ikki fær luttikið, so kann tað skaða alt liðið. Jonna Maria Hansen vil ikki kalla tað eitt trýst, men sigur, at neyðugt er at ofra seg fyri liðið. – Tað er torført, tá neyðugt er at velja millum fimleik og onnur ting, men eg havi vant meg við tað, tí í fimleiki má man ofra seg fyri liðið og fimleikin. Tað er ikki eitt trýst, ið liggur á okkum, men man ynskir, at liðið skal klára seg væl. ANGRI TAÐ IKKI Hóast Jonna Maria Hansen hevur brúkt hundraðtals av tímum upp á at íðka fimleik seinastu fjúrtan árini, og hevur verið noydd at valt onnur ting frá, so angrar hon einki, tó hon til tíðir kundi ynskt, at tað ikki fylti so nógv. – Tað verður ikki lættari eldri man verður, tí tá verða fleiri ting, ið krevja meiri tíð. Í skúlanum eru fleiri skúlating, man byrjar at arbeiða aftaná skúlatíð og meira tíð verður brúkt við vinfólkum. So tað verður verri, tí tá eg var yngri, so var ikki so nógv annað at velja í, sigur Jonna Maria Hansen, og leggur afturat. – Men eg angri ikki nakað sum helst. Mær dámar væl at íðka fimleik, men eg kundi onkuntíð ynskt, at tað ikki kravdi so nógv, og eg hevði betri tíð til vinfólk. Krevur offur – Ynskir tú at røkka málinum, so má ein vera klár at siga nei til hugna­kvøld, ball og annað við vinfólkunum, sigur Jonna Maria Hansen, ið greiðir frá, hvat krevst at vera millum fremstu estetiskar fimleikarar í Føroyum Jonna Maria Hansen FIMLEIKURIN KEMUR FRAM UM ALT ANNAÐ