mánadagur 22. august 2016síða 15

15 Mánadagur 6. januar 2014 · Nr. 2 Sosialurin Mánadagur 22. august 2016 · Nr. 95 Hugskot og viðmerkingar – send sms til 225000 RIO ER AV OL SERLIGAR LØTUR Í OL… Danska Sara Slott Petersen vinnur silvur í 400 metra forðarenning. Hetta er fyrsta heiðursmerki í kvinnuligum donskum frælsum ítrótti síðani Lily Carlstedt vann bronsu í spjótkasti í 1948. Amerikanski svimjarin, Ryan Lochte, verður handtikin fyri at hava íspunnið eina søgu um eitt ógvusligt álop á gøtuni. Tríggir aðrir svimjarar verða eisini handtiknir, men allir gjalda seg leysar. Lochte hevur orsakað seg alment og sagt, at hann tók ov rívan til. Brasilska manslandsliðið í fótbólti við Neymar á odda vinnur OL-finaluna heima á víðagitna Maracana-leikvøllinum frammanfyri 80.000 áskoðarum, tá ið finalan ímóti Týsklandi verður vunnin við brotssparkskapping eftir 1-1-javnleik í vanligari leiktíð. Svenska Sarah Sjöström setur nýtt heimsmet í 100 metrar firvald, tá ið hon í finaluni svimur tíðina 55,48. Hon átti sjálv heimsmetið frammanundan, sum var 55,64 frá HM í Kazan í fjør. Simone Manuel úr USA skrivar søgu, tá ið hon gerst fyrsti myrki svimjari, ið vinnur OL-gull sum einstaklingur. Hon vann gull á teininum 100 metrar frísvimjing. Við fimm gullheiðursmerkjum er amerikanski svimjarin, Michael Phelps, nú størsti gullmerkjaslúkur í OL-søguni. Hann hevur vunnið 23. Skulu øll heiðursmerki teljast við hjá 31 ára gamla svimjaranum, sum nú fer at gevast, so er talið 28. Danska manslandsliðið í hondbólti vinnur 28-26 í finaluni ímóti verandi OL-vinnarunum úr Fraklandi. Hetta er fyrstuferð í OL-søguni, at danska mansliðið vinnur heiðursmerki, og so enntá gull. Wayde van Niekerk úr Suðurafrika setur óvæntað nýtt heimsmet á 400 metra renning, tá ið hann á sjálvari geil átta rennur við tíðini 43.03. Tvey onnur heimsmet verða sett í frælsum ítrótti: etiopiska Almaz Ayana á 10.000 metrum (29:17.45) og polska Anita Włodarczyk í hamarkasti (82,29m). Danski Viktor Axelsen vinnur bronsu í einmansleiki hjá monnum í badminton. 22 ára gamli Odense-drongurin vinnur bronsudystin 2-1 í settum ímóti Lin Dan úr Kina. Í tvímansleiki hjá kvinnum vinna Camilla Rytter Juhl og Christinna Pedersen silvur. 71 ára gamli Pat Hickey, írskur limur í olympisku nevndini, verður handtikin og varðhaldsfongslaður undir illgruna fyri ólógliga víðarisølu av atgongumerkjum, ið hann hevur tjent milliónir upp á. Hann noktar seg sekan. Bolt í søgubøkurnar Risin av Jamaika er framvegis heimsins kvikasti, og í Rio setti hann eitt ótrúligt met Pætur Albinus Usain Bolt veit heilt einfalt ikki hvussu tað kennist at tapa í OL. Hann hevur luttikið í níggju OL-teinum, og hann hevur vunnið allar níggju. Í OL í Beijing í 2008 vann gull í 100 metrum, 200 metrum og 4x100 metrum saman við Jamaika. Tað sama gjørdi hann í London í 2012, og mín sann um hann ikki eisini gjørdi tað í Rio í ár. Hann er fyrsti maður í OL-søguni, sum vinnur eitt sokallað triple-triple, eitt trífalt hattrikk. Usain Bolt, sum fylti 30 ár í gjár, hevur sagt, at hetta var hansara seinasta OL. Bestu tíðir hansara liggja nøkur ár afturi í tíðini, kanska serliga í 2009, tá ið hann setti heimsmet bæði í 100 metrum og 200 metrum, men í Rio prógvaði hann, at hann framvegis er nógv tann skjótasti maðurin í heiminum. Hann snøgt sagt smurdi alla mótstøðu av. – Hetta var ein lætti. Nú er tað av. Eg eri glaður og errin av mær sjálvum. Tað gjørdist veruleiki. Trýstið hevur verið hart, og eg síggi hetta sum eitt stórt bragd, segði Usain Bolt, sum gevst eftir HM næsta ár.