týsdagur 11. oktober 2016síða 38

FÓLKAHEILSURÁÐIÐ OKTOBER 2016 6 MIÐLAHÚSIÐ – Fólkaheilsan er barometrið fyri tjóðina U m føroyingar av álvara skulu taka fólkaheilsu til sín, so er neyðugt, at tey, ið varðar av tí, tosa eitt mál, ið vanligi borgarin skilur. Tað er boðskapurin hjá Sirið Stenberg, landsstýriskvinnu í heilsu- og innlendismálum, ið eisini varðar av Fólkaheilsuráðnum. – Fólkaheilsa hevur stóran týdning, og tað er sera týdningarmikið, at vit gera tað til eitt fólksligt hugtak. Eitt hugtak sum fólk skilja, og ikki bara nakað yvirskipað, har man tosar í ástøðum, sigur Sirið Stenberg. Fyri at eydnast við tí, so metir landsstýris­ kvinnan, at tað er neyðugt at man tosar um fólkaheilsu sum eitt breitt hugtak. At man fevnir um allar partar av lívinum hjá borgaranum. – Hugtakið má vera fevnandi. Tá man tosaði um evnið fyri nøkrum árum síðan, var tað øgiliga smalt og fokus varð sett á likamliga heilsu. Men tað er í ferð við at broytast til eitt meira fevnandi hugtak, soleiðis at man sær menniskja sum eina eind av likamligum, sálarligum, andaligum og sosialum pørtum. Tað er týdningarmikið, um man ynskir at hugtakið skal fevna um øll fólk. Samfelagið fær ágóðan Sirið Stenberg er ikki í iva um, at tað er til tað besta fyri tjóðina, at fokus verður sett á fólkaheilsuna. – Fólkaheilsan er barometrið fyri tjóðina. Tað er grundleggjandi fyri hvussu virkisfør tjóðin er. Er fólkaheilsan góð, so framleiða vit meira og sjúkradagarnir eru færri, men er fólkaheilsan minni góð, so eru øll tey barometrini lægri. So fólkaheilsan er eitt gott barometur fyri hvussu eitt land er fyri, slær landsstýriskvinnan fast. Hóast sjúkrahúsverkið, Gigni, Fólkaheilsuráðið og onnur, ið hava við heilsuna hjá borgarunum at gera, hoyra til málsøkið hjá landsstýriskvinnuni í heilsu- og innlendismálum, metir Sirið Stenberg, at tað er týdningarmikið, at øll landsstýrisfólkini hava fólkaheilsuna í huga innan teirra økir. – Uppgávan hjá okkum sum landsstýrið er at gera fólkaheilsu til ein part av øllum ráðum. Hvussu fáa vit tað inn í skúlarnar, almannaverkið og aðrastaðni, har vit hava við fólk at gera. Fólkaheilsa má gerast ein inngrógvin í okkara arbeiðshátti, sigur Sirið Stenberg. Mugu finna javnvágin Fyrr í ár útnevndi landsstýriskvinnan eitt nýtt Fólkaheilsuráð, og higartil er hon væl nøgd við arbeiðið, ið nýggja ráðið hevur gjørt. – Tá vit valdu eitt nýtt Fólkaheilsuráð løgdu vit okkum eftir, at tey skulu vera fólkslig, skulu hugsa breitt og geva betri rúmd til sálarheilsu, sigur Sirið Stenberg og leggur afturat. – Tað hava tey megnað væl. Tey gera nógv upplýsandi arbeiði, og skipa millum annað fyri eini ráðstevnu í oktober, ið er ókeypis fyri allar borgarar. Landsstýriskvinnan vísir eisini á, at ein partur av tí, at boðskapurin skal vera fólksligur, inniber at man hevur virðing fyri, at fólk taka síni egnu val. – Vit mugu finna samanrenningina millum tað sunna lívið og góða lívið. Vit mugu virða, at fólk hava eitt val, men leggja upp til, at tey kunnu taka nøkur onnur val. Vit mugu viðurkenna, at fólk hava førleikarnar at taka støðu sjálv, og heldur enn at áleggja teimum hvat tey skulu gera, so mugu vit lyfta tey sunnu valini upp, sigur landsstýriskvinnan. – Fólkaheilsa hevur stóran týdning, og tað er sera týdningarmikið, at vit gera tað til eitt fólksligt hugtak. Eitt hugtak sum fólk skilja, og ikki bara nakað yvirskipað, har man tosar í ástøðum. Tað sigur Sirið Stenberg, landsstýriskvinna í heilsu- og innlendismálum Fólkaheilsa fyri øll! Ráðstevna í Norðurlandahúsinum Mánadagin 17. oktober kl. 09.00-12.00 Fyrilestrahaldarar Bente Klarlund Pedersen Magni Mohr Marin Strøm Line Nielsen Sirið Stenberg