hósdagur 12. januar 2017síða 15

FRÍGGJADAGUR 13. JANUAR 2017 SOSIALURIN 6 15 Veiðiloyvi og fiskiloyvi Fyri at kunna reka vinnuligan fiskiskap, hevur eitt skip brúka fyri einum veiðiloyvi og einum fiskiloyvi. Veiðiloyvi: Eitt veiðiloyvi verður givið einum fiskifari og gevur tí loyvi at veiða fisk á føroysku leiðunum. Eitt veiðiloyvi krevst fyri at kunna reka vinnuligan fiskiskap. Fiskiloyvi: Eitt fiskiloyvi er rætturin at fiska ávísar fiskidagar ella ávísa nøgd av einum fiskaslagi. Fiskiloyvir verða útskrivaði árliga og inniheldur millum annað treytir fyri reiðskap. Fiskiloyvir kunnu seljast til aðrar aktørar í vinnuni. Eitt skip kann bert hava eitt veiðuloyvi, men fleiri fiskiloyvir. Til dømis hava fleiri skip í bólki tvey, fiskiloyvir á føroysku leiðunum, umframt loyvi at fiska makrel í føroysum og útlendskum sjógvi. Skipabólkar Bólkur 2 Bólkur tvey eitur Trolarar. Bólkurin er ein samanlagdur bólkur av fyrrverandi bólki eitt, lemmatrolarar, og fyrrverandi bólki tvey, partrolarar. Teir báðir bólkarnir blivu samanlagdir í 2011 í ein bólk, ið gjørdist bólkur tvey, trolarar. Fyrrverandi bólkur eitt umfataði skip, ið fyri tað mesta fiskaðu fisksløg sum kongafisk og blálongu á djúpum vatni, á ytru føroysku landleiðini. Partrolarar royndu fyri tað mesta longri inni og fiskaðu næstan bert onnur fiskasløg sum upsa, tosk og hýsu. Við tíðini broyttist mynstri serliga fyri djúpvatnstrolararnar og teir fiskaðu meira av somu sløgum sum partrolararnir. Í 2011 bleiv stig tikið til, at bólkur eitt og tvey løgdu saman í ein bólk, sum kallast bólkur tvey og umfatar bæði djúpvatnstrolarar og partrolarar. Skipini í bólki tvey fiska sambært fiskidagaskipanini. Tað vil siga, at ein samlað nøgd av fiskidøgum verður útskrivað til skipabólkin og síðani verða dagar eisini givnir reiðaríunum. Bólkur tvey fekk tillutað 4114,77 dagar á innaru leið og 1479,77 dagar á ytru leið í fiskiárinum 2016/17. Ávísir trolarar í bólki tvey hava eisini loyvi at fiska av eini felagskvotu av makreli. Fiskiloyvini, ið verða útskrivað í bólki tvey eru: - Bólkur 2, trolarar 1: Loyvið verður útskrivað til skip, ið fyrr vórðu í bólki eitt. Loyvið heimilar veiðu á ytru og innaru leiðunum undir Føroyum, ið verður stýrt við fiskidøgum. - Bólkur 2, trolarar 2: Loyvið heimilar veiðu á innaru leiðunum undir Føroyum, ið verður stýrt eftir fiskidøgum. - Makrelveiða í altjóða, føroyskum, norskum og ES sjógvi: Loyvið hjá ísfiskatrolarum at fiska makrel í januar-februar og oktober- desember. Trolararnir fiska av eini heildarkvotu á góð 19.500 tons. Trolari skal hava tiløgn frá Vørn um ætlanin er at fiska í norskum ella ES sjógvi. Treytin er, at felagsatgongdin avtalað millum partarnar, ikki er uppfiskað. Hámarkskvotan er 1947 tons fyri hvørt skip. Bólkur 3 – Línuskip størri enn 110 tons. Bólkur trý er øll línuskip, ið eru størri enn 110 tons. Sambært teimum yvirlitum, sum vit hava, so eru tað 18 línuskip, ið eru størri enn 110 tons. Fimm av teimum eru frystilínuskip, ið merkir, at tey hava orku at frysta fisk umborð, í mun til ísfiskalínuskip, ið ikki kunnu frysta fisk umborð. Ågot, Eivind, Kambur, Klakkur og Stapin eru frystilínuskip, ið eisini merkir, at tey kunnu gera longri túrar uttan at tað gongur útyvir góðskuna av fiskinum. Tað er ein fyrimunur tá ein til dømis fer yvir á Flemish Kap at fiska. Fiskiskapurin í bólki trý er skipaður eftir fiskidagaskipanini. Tað vil siga, at ein samlað nøgd av fiskidøgum verður útskrivað til skipabólkin og síðani verða dagar eisini givnir reiðaríunum. Bólkur trý fekk tillutað 1924,71 dagar á innaru leið í fiskiárinum 2016/17. Ávís skip hava eisini loyvi at fiska brosmu og longu í ES sjógvi av eini felagskvotu. Fiskiloyvini, ið verða útskrivaði í bólki trý eru: - Bólkur 3, línuskip yvir 110 tons: Loyvið heimilar veiðu á innaru leiðunum undir Føroyum, ið verður stýrt eftir fiskidøgum - Toskur á Flemish Kap: Loyvið gevur línuskipum loyvi at fiska av eini felagskvotu á 3114 tons av toski. - Brosma og longa í ES sjógvi: Loyvið gevur línuskipum loyvi at fiska av eini felagskvotu á 200 tons av brosmu og longu í ES sjógvi. Loyvt er eisini at hava upp til 20% sum hjáveiðu, tó í mesta lagið 75 tons. Bólkur 4 – Útróðrarbátar Bólkur fýra er býttur upp í tríggjar undirbólkar: bólkur 4A (bátar millum 15-40t), bólkur 4B (bátar størri enn 40t við línu), bólkur 4T (bátar størri enn 40t við troli). Sambært okkara upplýsingum eru tað tilsamans 27 skip skrásett í bólki fýra. Skipini í bólki fýra fiska sambært útskrivaðum fiski­ døgum. Tað vil siga, at ein samlað nøgd av fiskidøgum verður útskrivað til skipabólkin og síðani verða dagar eisini givnir reiðaríunum. Bólkur 4A fekk tillutað 571,03 dagar á innaru leið í fiskiárinum 2016/17. Bólkur 4B fekk tillutað 749,92 dagar á innaru leið í fiskiárinum 2016/17. Bólkur 4T fekk tillutað 1172,61 dagar á innaru leið í fiskiárinum 2016/17. Eisini hava ávís skip í bólki 4T loyvi at fiska makrel av eini felagskvotu Fiskiloyvini, ið verða útskrivaði í bólki fýra eru: - Bólkur 4A – útróðrarbátar millum 15-40 tons: Loyvið heimilar veiðu á innaru leiðunum undir Føroyum, ið verður stýrt eftir fiskidøgum - Bólkur 4B, útróðrarbátar størri enn 40 tons á línuveiðu: Loyvið heimilar veiðu á innaru leiðunum undir Føroyum, ið verður stýrt eftir fiskidøgum - Útróðrarbátar størri enn 40 tons á trolveiðu: Loyvið heimilar veiðu á innaru leiðunum undir Føroyum, ið verður stýrt eftir fiskidøgum - Makrelveiða í altjóða, føroysk­ um, norskum og ES sjógvi: Loyvið hjá trolarum í bólki 4T at fiska makrel í januar-februar og oktober-desember. Trolararnir fiska av eini heildarkvotu á góð 1905 tons. Trolari skal hava tiløgn frá Vørn um ætlanin er at fiska í norskum ella ES sjógvi. Treytin er, at felagsatgongdin avtalað millum partarnar, ikki er uppfiskað. Bólkur 6 – Ymiskt Tað eru í løtuni trý skip, ið fiska við gørnum undir Føroyum: Oknin, Thor og Vesturland. Tað vórðu fýra skip, ið vórðu í bólkinum, men Anita hevur í løtuni einki góðkent fiskiloyvi. Fiskiskapurin við gørnum eftir havtasku og svartkalva verður stýrd eftir kunngerð nr. 105 frá 5. august 2013, ið gevur fýra førum loyvi beinleðis at royna eftir svartkalva og havtasku við gørnum. Fiskiloyvi bleiv latið teimum, sum í 2012 høvdu fingið fiskiloyvi ella rætt til fiskiloyvi. Leiðirnar, ið loyvdar eru at fiska á eru nærri greinaðar í kunngerðini. Fiskiloyvini, ið verða útskrivaði í bólki seks eru: - Fiskiskapur eftir svartkalva og havtasku við gørnum á føroysku landleiðunum Sí omanfyri fyri frágreiðing. Nótaskip, Rækjuskip, Verksmiðjuskip og Ídnaðarskip Allur fiskiskapur hjá hesum skipabólkum er eftir kvotaskipan, bæði undir Føroyum og uttan­ lands. Tað vil siga, at millum­ landasamráðingar og ásetan av kvotum av landsstýrismanninum í fiskivinnumálum, ásetir hvussu nógv skipini hava at fiska. Í millumlandasamráðingum verða kvotur av ávísum fiskaslagið givnar til onnur lond afturfyri atgongd til teirra sjóøki. Skipini fáa í stóran mun ásett eina eginkvotu. Tað merkir, at hvørt skip hevur eina ávísa nøgd at fiska, ið eingin annar kann fiska av. Tó er tað ikki skipað á tann hátt í øllum fiskiskapi. Summi skip, ið hava makrelloyvi, men ikki eru nótaskip, Ran og Næraberg til dømis, fiska av eini felagskvotu. Rækjuveiðan við Svalbard hjá Havborg og Arctic Viking verður stýrd eftir fiskidøgum. Har eru 922 felags fiskidagar við Svalbard, ið skipini deila millum sín.