hósdagur 26. oktober 2017síða 15

FRÍGGJADAGUR 27. OKTOBER 2017 SOSIALURIN 125 STÓRA INNANDURA FORÐABREYTIN Skúgva møblarnar til viks og ger eina forðabreyt við teimum lutunum, sum tú eigur inni. Dømi til forðabreytina: Tak eina skitnatoyskurv og ger eina avbjóðing, har man brúkar samanlagdir sokkar til at venja seg í at kasta. Klistra nakað av tógvi á gólvið, har tað ber til at venja balansu við at ganga á linjuni. Legg pútur og teppi á gólvið og spæl Jørðin er eitrað Lat børnini grulva undir borðið og undir stólarnir, og brúka ein kust til at spæla Limbo SJÁLVSMYNDIR Setið tykkum niður við einum spegli, pappíri og litblýantum. Avbjóðingin er at hyggja í spegilin og royna at tekna seg sjálvan. Minn børnini á eygnabrýr og vippur og aðrar smálutir á andlitinum. Tað er eisini avbjóðandi at tekna allan kroppin, og síðani at velja hvørji klæðir eisini skulu teknast. HVAT ER Í PAPPESKJUNI? Tak eina stóra eskju og sker hol á síðurnar, so armurin á børnunum passar í holið. Pynta eskjuna við onkrum pappíri, tekningum ella øðrum, um tú hevur hug. Tá tað er klárt at spæla, so setur tú ymsikar lutir inn í eskjuna. Síðani skulu børnini skiftast um at koyra hondina inn í eskjuna, og síðani gita, hvat er í. Klára tey ikki at gita, so kanst tú geva teimum “hint” ella tey spyrja fleiri spurningar um lutin, hvat hann kann skal brúkast til, hvønn lit hann hevur og so framvegis. Til ber at brúka vanligar lutir, so sum litblýantar, leikur ella eina frukt. Tú kanst eisini nýta lutir, sum eru ólekkrir at røra við, so sum kókað spagetti, smør ella ein vátan lappa. Gita tey rætt, so fáa tey stig. SÁA KARSI SAMAN VIÐ BØRNUNUM Urtin karsi vaksur ómetaliga skjótt – og tað er gott, tá børnini bíða eftir ávøkstinum. Tað tekur bert eini 10 dagar, eftir at karsi er sáa, til tað er klárt at eta. Eitt boð er at brúka ein tóman og reinan mjólkapakka, sum er skorin eftir longdini, ella at brúka botnin av pakkanum, um ein ynskir eina minni mongd. Legg váta køksrullu í botnin og legg síðani vátt bummulsvátt omaná. Lat eini tríggjar sentimetrar vera frá vattinum til toppin av mjólkapakkanum. Spjaða karsefræ á vattið og tryst tað eitt sindur niður við fingrunum. Set karsið fjálgt og ljóst, og minst til at minni børnini á at geva tí vatn hvønn dag, so vattið verður vátt. Tá karsið er á leið 10 sentimetrar, so ber til at kippa og eta tað. Karsi smakkar til dømis sera væl omaná egg. 15 Heimagjørdir dekkserviettar Legg ein pappírsdúk á borðið og tak máling, pensar og góða hugflogið fram. Mála tað tykkum lystir á pappírið, men tá børnini eru liðug, kunnu myndirnar klippast til og laminerast. Tær kunnu síðani brúkast til dekkserviettar. Hetta er so fitt og persónligt, og børnunum dáma væl at síggja mydnirnar aftur, tá tey skulu eta. Minnisspæl Legg eini 10 ymisk ting á ein bakka - hetta kann vera alt millum himmal og jørð – og bið síðani børnini royna at minnast tað, sum er á bakkanum. Tú kanst avgera, hvussu langa tíð tey fáa til at royna at minnast. Legg síðani eitt viskistykki omaná bakkan, og bið børnini endurgeva tað, sum var á bakkanum. Tann sum minnist flest ting vinnur spælið. Eru fleiri børn, so kunnu tey býtast í bólkar, og í bólkunum royna at minnast, hvat var á bakkanum. Legg okkurt annað á bakkan, tá næsti bólkurin skal royna at minnast. SKATTAVEIÐA Vel eitt tema, sum til dømis eitt ávíst mynstur, bókstavir ella litir, og farið síðani og leitið í húsinum. Bið til dømis børnini finna tríggjar grønar lutir, ella fimm fýrkantaðar lutir. Ger eitt skema, og set x við hvørjaferð, tey hava fulfíggjað uppgávuna. Hetta spælið hóskar seg eisini væl, tá børnini skulu læra bókstavir. Tá kunnu tey til dømis brúka myndatólið á teldlinum ella telefonini og taka myndir av tí, sum tey finna, ið byrjar við bókstavinum, ið tey leita eftir. Hvørjaferð ein mynd er tikin, so fær barnið eitt x í skemaði. STUTTLIGAR SØGUR Tú byrjar við einum setningi, og síðani skal barnið leggja ein setning afturat tínum. Tú kanst til dømis siga: “Ein reyð kúgv og ein bláur seyður fingu sær drekkamunn”, og síðani taka børnini yvir. Tað verður skótt ordiliga stuttligt, og hetta spælið hóskar seg eisini væl til biltúrin.