mánadagur 5. februar 2018síða 17

17 Mánadagur 6. januar 2014 · Nr. 2 Sosialurin Mánadagur 5. februar 2018 · Nr. 15 Hugskot og viðmerkingar – send sms til 225000 FÓTBÓLTUR 4. CHELSEA Verandi meistararnir í Chelsea hava havt eitt heldur skuffandi kappingarárið samanborið við í fjør. Tað var tíðliga eitt sindur av rumbuli rundanum Chelsea farna summar, tá stjørnuáleyparin, Diego Costa, streykaði við at spæla fyri London felagið. Tað tóktist tó ikki at vera tann stóri missurin í byrjanini av kappingarárinum, tá nýinnkeypti Alvaro Morata fekk eina dreymabyrjan fyri Chelsea. Men tað støðið hevur Alvaro Morata ikki megna at hildið síðani. Tað er serliga í álopspartinum at trupulleikarnir hjá Chelsea hava verið hetta kappingarárið, tí av teimum seks ovastu liðunum hevur Chelsea skorað fæst mál. Í verjupartinum hevur hilnast væl. Serliga væl hevur tað hilnast hjá danska Andreas Christensen, ið eitt sindur óvæntað hevur tikið pláss á liðnum fyri David Luiz, ið annars spældi sannførandi seinasta kappingarárið. Karakterur frá Sosialinum higartil hetta kappingarárið: 6 av 10 5. TOTTENHAM Vóru nærmasti avbjóðari til meistaraheitið í fjør, men eru í ár langt frá meistaraheitinum. Tó er Tottenham seinastu árini farið frá at vera tann bleyta millumvøran, til at teir nú vera tiknir í álvara. Leikliga er Tottenham eisini millum tey mest støðugu liðini í Premier League, har teir sum heild eru eitt av teimum liðunum, sum eru mest á bóltinum til dystir í Premier League. Stóri spælarin hjá Tottenham hetta kappingarárið hevur enn einaferð verið Harry Kane, ið eisini er toppskjútti í Premier League. Karakterur frá Sosialinum higartil hetta kappingarárið: 6 av 10 6. ARSENAL Arsenal er seinastu árini farið frá at vera eitt støðugt topp fýra felag, til nú at vera eitt felag, sum hevur trupulleikar við at vinna sær sætið millum tey ovastu liðini. Tað tykist eisini at vera ein av orsøkunum til, at Alexis Sanchez fyri fáum viku síðani valdi at skifta frá Arsenal til Manchester United. Higartil hevur Arsenal hetta kappingarárið avrika margháttligt. Viðhvørt sær Arsenal leikliga út til at vera tað besta liðið í Premier League, og aðrar løtur kennir man als ikki sama Arsenal lið aftur. Tað tykist tó ógvuliga sannlíkt, at Arsenal aftur í ár fer at enda uttanfyri topp fýra pláss í Premier League, og so er spurningurin hvussu leingi Arsene Wenger fer at halda sum venjari hjá Arsenal afturat. Karakterur frá Sosialinum higartil hetta kappingarárið: 5 av 10 7. BURNLEY Burnley eru størsta yvirraskilsi í Premier League hetta kappingarárið, og eru í løtuni nærmastu avbjóðarar hjá teimum seks stóru feløgunum í Premier League. Í fjør endaði Burnley á einum 16’inda plássi í deildini, og hetta kappingarárið hevur felagið tikið seg nógv fram. Hóast fáir kendir profilar eru á liðnum hjá Burnley, fær Burnley góð úrslit móti flest øllum liðunum í Premier League. Tað er serliga góða organisatiónin, ið tryggjar Burnley góðu úrslitini, tí Burnley hevur bert skotið 21 mál í teimum fyrstu 26 dystunum, meðan tað einans eru farin 23 mál ígjøgnum. Karakterur frá Sosialinum higartil hetta kappingarárið: 9 av 10 8. LEICESTER Leicester fekk ikki tí bestu byrjanina uppá hetta kappingarárið, men síðani franski Claude Puel hevur tikið yvir í felagnum, hevur gingið støðugt framá. Tá Claude Puel tók yvir í oktober í 2017 stríddist Leicester í niðurflytingarstríðnum av deildini. Í dag kappast Leicester um at enda á plássi sum gevur altjóða luttøku til komandi kappingarár. Karakterur frá Sosialinum higartil hetta kappingarárið: 7 av 10 9. BOURNEMOUTH Lítla enska felagið við vældámda Eddie Howe sum venjara, hevur enn einaferð gongd í einum góðum kappingarárið í Premier League hetta kappingarárið. Bournemouth fekk eina keðiliga byrjan uppá kappingina, men hevur fingið vent gongdini. Seinastu vikurnar hevur Bournemouth verið millum tey mest formsterku feløgini í Premier League, og í løtuni liggur felagið á einum níggjunda plássi. Karaterur frá Sosialinum higartil hetta kappingarárið: 7 av 10 10. EVERTON Kappingarárið hjá Everton hevur verið tvíbýtt. Tað hevur verið tíðarskeiðið undir Ronald Koeman, og síðani verið tíðarskeiðið undir Sam Allardyce. Undir Ronald Koeman fekk Everton eina vánaliga byrjan, og var hótt av niðurflytingarstríðnum leingi. Men síðani Sam Allardyce hevur tikið yvir í Everton, hevur gingið heldur betur. Felagið brúkti tó í summar nógvar pengar, og hevði helst sett nøsina upp eftir meira enn einari plasering á tíggjunda plássi í deildini. Karakterur frá Sosialinum higartil hetta kappingarárið: 5 av 10 11. WATFORD Watford hevur seinastu árini havt nógvar venjarar, og hevur hetta kappingarárið eisini einaferð skift venjaran. Tað gjørdu teir seinast í januar, tá vældámdi Marco Silva var koyrdur til hús, hóast Watford tá lá mitt í deildini í Premier League. Síðani hevur spanski Javi Gracia tikið yvir, og í trimum royndum hjá honum, hevur higartil ikki eydnast honum at vunnið ein dyst við Watford. Í mun til at Watford fyri fáum árum síðani var eitt felag, sum støðugt lá í botninum av Premier League ella í næstbestu deildini, hevur Watford hesi seinnu árini stabilisera seg í Premier League. Karakterur frá Sosialinum higartil hetta kappingarárið: 6 av 10 12. WEST HAM Eins og hjá Everton, hevur kappingarárið hjá West Ham í ár eisini verið tvíbýtt. Tað hevur verið tíðarskeiðið undir Slaven Bilic, og síðani verið tíðarskeiðið undir David Moyes. Undir Slaven Bilic gekk illa hjá West Ham hetta kappingarárið, har serliga nýinnkeypini høvdu tað trupult við at sláa til í deildini. Men síðani David Moyes hevur tikið yvir í London felagnum, hevur West Ham støðugt flutt seg vekk úr botninum. Men eins og hjá Everton, hevði West Ham helst størri málsetning undan kappingarárinum, enn tað teir hava avrikað í ár. Karakterur frá Sosialinum higartil hetta kappingarárið: 5 av 10 13. BRIGHTON Saman við Burnley hava uppflytararnir úr Brighton verið stóra yvirraskilsi í Premier League hetta kappingarárið. Undir leiðslu av Chris Hughton, sum á sinni keypti Jóan Símun Edmundsson til Newcastle, hevur Brighton verið tað av teimum trimum uppflytaraliðunum, sum higartil hevur klárað seg best í Premier League. Serliga týski Pascal Gross hevur verið eyðsýndur á liðnum hjá Brighton hetta kappingarárið. Karakterur frá Sosialinum higartil hetta kappingarárið: 7 av 10 14. CRYSTAL PALACE Tað sá leingi út til at Crystal Palace hevði beina kós niður í næstbestu ensku deildina, men seinastu tveir mánaðirnar er gongdin hjá London felagnum av álvara vend. Undir leiðslu av Roy Hodgson, hevur Crystal Palace aftur fingið samband við hini feløgini í botninum av kappingini, og í løtuni er Crystal Palace omanfyri niðurflytingarstrikuna. Tó er lítið, ið skilir feløgini í botninum av deildini. Karakterur frá Sosialinum higartil hetta kappingarárið: 5 av 10 15. SOUTHAMPTON Southampton, sum seinastu árini hevur fótað sær sum eitt Premier League lið í miðjuni ella beint omanfyri miðjuna, hevur í ár havt eitt skuffandi kappingarár í mun til undanfarnu árini. Í løtuni er Southampton av álvara hótt av botninum av deildini, og í løtuni er stórt trýst á spanska venjaranum hjá Southampton, Mauricio Pellegrino. Um vikuskiftið fingu hann og Southampton tó ein kærkomnan 3-2 sigur móti West Bromwich. Karakterur frá Sosialinum higartil hetta kappingarárið: 3 av 10 16. NEWCASTLE Málsetningurin hjá Rafael Benitez og Newcastle sum uppflytarar til hetta kappingarárið, hevur alla tíðina verið, at felagið skal klára at yvirliva í niðurflytingarstríðnum av deildini. Higartil heldur tann málsetningurin, hóast at kappingin í botninum í løtuni er ógvuliga hørð. Í løtuni er Newcastle eitt stig røttu megin niðurflytingarstrikuna. Fyri fótbóltin í norður-økinum av Onglandi, hevur tað stóran týdning, at Newcastle aftur klárar at stabilisera seg í deildini, og har tykist Rafa Benitez vera tann rætti maðurin. Karakterur frá Sosialinum higartil hetta kappingarárið: 5 av 10 17. SWANSEA Hjá Swansea hevur kappingarárið mint um tað hjá Crystal Palace. Har hevur ein partur av kappingarárinum verið ógvuliga kreppuraktur, meðan tann seinasta tíðin hevur verið góðkend. Í løtuni er tað heldur ótrúligt at Swansea aftur er omanfyri niðurflytingarstrikuna, eftir at tað eitt tíðarskeið í 2017 tóktist nærum vera ómøguligt. Reyði tráðurin í Swansea, sum gjørdi walisiska felagið serstakliga sjamerandi fyri fáum árum síðani við einum serligum spælistíli, tykist tó ikki síggjast aftur í walisiska felagnum í løtuni. Karakterur frá Sosialinum higartil hetta kappingarárið: 4 av 10 18. STOKE Stoke, sum seinastu nógvu árini hevur spælt í Premier League, er í løtuni í tungum sjógvi. Fyri stuttari tíð síðani koyrdi Stoke venjaran Mark Hughes, sum annars var væl dámdur í enska felagnum, til hús eftir eina røð við keðiligum úrslitum. Í løtuni er Stoke undir niðurflytingarstrikuni, sum er væl undir tað, sum var væntað av Stoke undan kappingarárinum. Karakterur frá Sosialinum higartil hetta kappingarárið: 2 av 10 19. HUDDERSFIELD Uppflytararnir úr Huddersfield fingu eina flúgvandi byrjan uppá kappingarárið í Premier League, men eru seinastu mánaðirnar støðugt farnir niður eftir á stigatalvuni í Premier League. Í løtuni er Huddersfield næst niðast í Premier League, og sum avrikini hava verið seinastu tíðina, skal tað vera ógvuliga løgið, um Huddersfield komandi kappingarár ikki verður at síggja í næstbestu ensku deildini. Tó var væntandi at Huddersfield fór at stríðast í botninum hetta kappingarárið. Karakterur frá Sosialinum higartil hetta kappingarárið: 3 av 10 20. WEST BROMWICH Eitt sindur óvæntað liggur West Bromwich í løtuni greitt niðast í Premier League. Felagið hevur heili fimm stig upp til niðurflytingarstrikuna. Men seinastu tíðina hava úrslitini verið heldur betur hjá West Bromwich. Tað hevur serliga verið aftaná at Alan Pardew yvirtók venjarastarvið í West Bromwich. Tað er tí væntandi at West Bromwich fer at gera kappingina í botnstríðnum uppaftur harðari ta komandi tíðina. Karakterur frá Sosialinum higartil hetta kappingarárið: 2 av 10 Ársins lið hjá Sosialinum higartil hetta kappingarárið (4-2-3-1) David de Gea (Manchester United) Antonio Valencia (Manchester United) Andreas Christensen (Chelsea) Nicolas Otamendi (Manchester City) Marcos Alonso (Chelsea) Fernandinho (Manchester City) Kevin de Bruyne (Manchester City) Mohamed Salah (Liverpool) Raheem Sterling (Manchester City) Leroy Sané (Manchester City) Harry Kane (Tottenham)