mánadagur 26. februar 2018síða 20

Mánadagur 26. februar 2018 · Nr. 24 20 Sosialurin Hugskot og viðmerkingar – send sms til 225000 FLOGBÓLTUR Hilmar Jan Hansen Satt at siga, sá einki serligt út hjá Fleyr, tá tey bæði fyrstu settini av steypafinaluni hjá kvinnum vóru spæld í nýggju umstøðunum á Hálsi í Havn leygardagin, tí Dráttur var á odda 2-0. Hóast tølini fyri settini ikki sóu so øgilig út, var spælið á vøllinum sera sannførandi, og tað gekk sjón fyri søgn, at tað annars so suverena oddaliðið í kvinnukappingini var týðiliga skelkað. Spælararnir hjá Drátti spældu við nógv størri sjálvsáliti og nógv størri trúgv uppá, at tað kundi bera til at vinna dystin. Vágakvinnurnar tordu at sláa bóltarnar og at taka neyðugu avgerðirnar, og tí fekk Fleyr ongantíð fatur í spælinum hjá Drátti, men rann bara aftaná. Servutrýstið riggaði væl, og serliga lá væl fyri hjá Annu Súnadóttir Hansen og Ruth Albinsdóttir at fáa vinnarasløgini ígjøgnum. Sostatt var Dráttur bara eitt sett frá at fara avstað við øllum, tá hesin nýggi steðgurin millum annað og triðja sett kom, tá spælararnir fóru inn í umklæðingarrúmið og skipað var fyri onkrum undirhaldi millum fjepparar úti á vøllinum í meðan. Steðgurin hjálpti Og tað skuldi vísa seg, at júst hesin steðgurin var tað, Fleyr hevði brúk fyri, fyri at koma fyri seg aftur. Spælararnir gramdu seg um, at einki hoyrdist inn á vøllin av tí, Kristian Mikkelsen sum venjari royndi at rópa, og tað passaði ikki honum so væl, tí hann er vanur at dirigerað so nógv frá síðulinjuni, sum hann kann. Royndasti spælarin av øllum í steypafinaluni, Anja Sonnadóttir Danielsen, ið hevur heilar 42 landsdystir á baki og eftir dystin var kosin besti spælari, ásannaði eftir dystin, at hesin tíggju minuttir langi steðgurin millum annað og triðja sett kom sum ein sonn bjarging fyri Fleyr: – Steðgurin hjálpti okkum øgiliga nógv, so vit fingu vent dystinum og vunnið, segði hon og vísir eisini á, at tað munaði væl, at venjarin gjørdi nakrar broytingar, so tríggjar á liðnum býttu um pláss. – Og so fingu vit onkursvegna eisini yvirlivilsisinstiktið fram, eftir at vit í teimum báðum fyrstu settunum kanska høvdu verið eitt sindur bangnar fyri at tapa, tí Dráttur byrjaði so sterkt. Vit vóru allar nervøsar og vistu, hvat stóð upp á spæl, men tíbetur fingu vit fótað okkum og vunnið til síðst. Anja gekk undan Fleyr vann nú tey bæði næstu settini og kom upp á 2-2, so dysturin aftur var púra opin. Fremsta orsøkin til tað var, at brádliga líktist Fleyr aftur tí oddaliðnum, sum liðið er í landskappingini, og samstundis sum tað eydnaðist at fáa blokkspælið at rigga og Anja Sonnadóttir Danielsen veruliga fór at ganga undan, gjørdist Fleyr alsamt meira sannførandi. Í fimta setti vísti Anja serliga í fyrstu bóltunum, at hon var til reiðar at taka eitt tak fyri liðið. Tað hevði óivað eisini sína ávirkan á útnevningina sum besti spælari, at hon setti Fleyr ordiliga í gongd í fimta setti við at vinna fýra av teimum fyrstu fimm bóltunum, sum Fleyr fekk. – Eg hugsi ikki so nógv um tað at vera dagsins spælari, annað enn at tað nokk vísir, at man hevur gjørt okkurt rætt fyri liðið. Sjálv hugsi eg nógv um mítt egna avrik, í tann mun tað kann hjálpa liðnum, sigur dagsins steypafinalistur, ið nú hevur hug at hyggja frameftir. – Nú hava vit klára at víst styrki, tí vit komu aftur í steypafinaluni, eftir at hava verið aftanfyri 0-2, so tað gevur okkum sjálvandi trúgv uppá, at vit aftur í ár kunnu taka greipuna, sum vit gjørdu tað fyri tveimum árum síðani. hilmarjan@sosialurin.fo Kvinnufinalan: FLEYR YVIRLIVDI SJOKKIÐ Dráttur streyk avstað við sannførandi spælið tey bæði fyrstu settini, men tá avtornaði, stóð Fleyr allíkavæl ovast á sigurspallinum við steypinum upp um høvd. – Steðgurin millum annað og triðja sett, hjálpti okkum øgiliga nógv, so vit fingu vent dystinum og vunnið, ásannaði dagsins spælari, Anja Sonnadóttir Danielsen, eftir finaluna Fleyr-Dráttur 3-2 (22-25, 22-25, 25-15, 25-21, 15-8)