hósdagur 3. mai 2018síða 19

FRÍGGJADAGUR 4. MAI 2018 SOSIALURIN 50 19 RÁ TÍ UPPLAGDA York (Ongland) Víkingarnir kallaðu býin Jorvík. York liggur har norðuri í Onglandi og hevur havt nógvan ídnað. Men har eru eisini áhugaverd støð at vitja. Miðalaldarbygningar eru varðveittir, og stóri gotisku katedralurin York Minster er stórsligin og spennandi at vitja. Og so kanst tú sjálvandi njóta býarlívið á York Shambles ella detta inn á ein av mongu pubbunum í býnum. Puglia (Italia) Italski hælin har suðuri í landinum bjóðar hugtakandi arkitektur, forvitnislig slott og kirkjur og vakra náttúru. Høvuðsstaðurin í landslutinum er Bari, har stívliga 300.000 fólk búgva. Hetta økið í Italia er ikki so tyngt av ferðavinnu, sum onnur øki, men hevur kortini sera nógv at bjóða vitjandi. Maribor (Slovenia) Tað er vakurt í Slovenia. Bled sjógvurin er kendasta ferðamálið, men fleiri onnur áhugaverd og vøkur støð eru at vitja. Maribor liggur við ánna Drava og er næststørsti býurin í landinum. Fólkatalið er undir hundrað túsund, og býurin tykist tí ikki ovurhondsstórur. Lívligar gøtur og torg gera býin hugnaligan og hugaligan at vitja. Krakow (Pólland) Samstundis sum Pólland støðugt mennir seg sum nútímans samfelag, er samfelagið merkt av farnum tíðum. Býurin Krakow er ein av vakrastu býunum í landinum. Býurin varð ikki bumbaður undir seinna heimsbardaga, og tí eru nógv fornminni varðveitt. Krakow hevur út ímóti 800.000 íbúgvar og liggur har suðuri í Póllandi nærindis markinum til Slovakia. Valencia (Spania) Partar av árinum er Barcelona um at ganga undir í ferðafólki. Valencia, sum liggur tríggjar tímar longri suðuri, er ikki eins hart raktur av hópferðavinnu, men kann blíva tað komandi árini, tí býurin hevur nógv at bjóða. Valencia hevur stórslignan arkitektur, gamlan sjarmerandi býarpart, óteljandi matstovur og kaffistovur á smølum gøtum og torgum. Her fært tú eitt fullkomið bland av stórbýi og hugna. Lerwick (Hetland) Tíverri er ikki longur beinleiðs samband úr Føroyum til Hetlands, men við flogleið til Edinburgh ber til at koma rímiliga lætt til oyggjarnar norðan fyri Skotland. Lerwick er sjarmerandi høvuðsstaðurin í Hetlandi, og hóast samfelagið ikki tykist so framkomið sum tað føroyska, er býurin avgjørt eina vitjan verd – og her skalt tú ikki berja teg ígjøgnum ferðafólkarúgvur sum aðrastaðni.