mánadagur 6. august 2018síða 15

15 Mánadagur 6. januar 2014 · Nr. 2 Sosialurin Mánadagur 6. august 2018 · Nr. 89 Hugskot og viðmerkingar – send sms til 225000 Hann hevur evnini at verða millum bestu spælararnar í føroyskum fótbólti, men skaðar gera nú, at Aleksandar Stankov gevst í HB. Hann fyltir nú heima aftur til Hollands FÓTBÓLTUR Tróndur Arge Hann kom til HB í fjør, sum ein av fleiri útlendskum profilum. Teirra millum Martin Bergvold og Daniel “Elly” Pedersen. Felagið hevði brúk fyri spælarum, sum kundu lyfta felagið upp aftur millum tey bestu í landinum. Í 18 dystum skorar Aleksandar Stankov tíggju mál, og í fleiri av dystunum vísti hann fótbóltsspæl á hægri stigi enn vit síggja til dagligt. Undan hesum kappingarárinum var mett, at hann kundi blíva ein av profilunum í føroyskum fótbólti. Í Fótbóltsblaðnum hjá Sosialinum stendur at lesa, at er lyklaspælarin á liðnum; -Aleksandar Stankov skoraði 0,63 mál per dyst í fjør. Tað er áleið tað sama, sum toppskjúttarnir í landinum klára. Trupulleikin hjá honum var bara talið av dystum. Hann hevði ein skaða at dragast við, men serliga papírarbeiðið kom i vegin. Spælir hann allar dystirnar í ár, so er hann ein spælari, sum kann blíva ársins spælari, stendur at lesa í blaðum. Í samrøðu við sama blað sigur Aleksandar Stankov: -Føroyar er eitt fantastiskt stað og her eru nógv støð at vitja, men tá tú ikki ert herfrá ella hevur familju her, so verður ringt at velja Føroyar í longdini, tá málið er yrkisfótbóltur. Tað sigi eg við allari virðing fyri føroyskum fótbólti, tí her eru eisini spælarar, sum lættliga kundu spælt uttanlands, sigur Aleksandar Stankov. Skaðar steðga Stankov Eftir seks dystir og eitt mál, so hevur fyrrverandi Roda JC og Viborg spælarin valt at gevast í HB og føroyskum fótbólti. Áhaldandi skaðar hava gjørt, at sterki makedonin ikki hevur verið nær námind tí stignum, sum hann kann. Hann hevur sitið uttanfyri megin partin av kappingarárinum, og júst sum hann tóktist klárur, so kom ein nýggjur skaði. Aleksandar Stankov kundi verið íblásturin, sum HB hevur brúk fyri beint nú, fyri at bjóða greipuni av. HB er tvey stig fremst í landskappingini og í steypafinaluni, men seinastu tveir dystirnir hava givið tekin um, at tað verður ikki bara lætt. HB tapti á ólavsøku fyri NSÍ, meðan sigurin á Skála var lítið sannførandi. Søgan um Aleksandar Stankov, er søgan tað, ið kundi verið. Leita eftir málum Tað hevur gingið so mikið væl hjá HB í ár, at ein skuldi hildið, at tað ikki var neyðugt við meiri tilgongd. Tó royndi HB í summar at fáa Jákup Thomsen, Patrik Johannesen og Søren B. Nielsen til felagið. Helst hava aðrir møguleikar eisini verið uppi at vent. Orsøkin er, at HB í løtuni ikki hevur ein áleypara, ið kann skjóta neyðugu málini. Higartil hevur ungi høgri vongurin, Adrian Justinussen, skotið 15 mál. Tað er næstan helmingurin av teimum 33 málunum, sum HB hevur skorað í ár. Hóast HB hevur fleiri áleyparar á lønarlistanum, so gongur illa at fáa skotið mál. Sebastian Pingel er skaddur, meðan Jógvan Skeel Nolsøe, Ari Mohr Olsen, Dan í Soylu og John Frederiksen hava skotið fimm mál til samans. Símun Samuelsen hevur skotið seks mál. Jákup Thomsen spælir við FH í Íslandi, har hann er útleigaður frá FC Midtjyllandi. Patrik Johannesen var áhugaður, men skiftið bleiv av ongum, meðan treytin fyri at Søren B. Nielsen kom til felagð var, at onkur fór úr hópinum. Her var millum annað upp á tal at útleiga John Frederiksen til 07 Vestur. Ársins dystur Tað er lagt upp til ársins dyst, tá KÍ fríggjadagin tekur móti HB í landskappingini. Dysturin verður spældur samstundis sum Summar Festivalurin verður í Klaksvík. HB liggur nummar eitt, tvey stig frammanfyri KÍ. Talan er um tvey tey søguríkastu feløgini í føroyskum fótbólti, sum samanlagt hava vunnið 39 meistaraheiti. Tó er langtsíðani, at tey hava verið í ein FM-stríði móti hvørjum øðrum. Umstøðurnar gera, at hetta kann blíva árins dystur í føroyskum fótbólti. trondur@sosialurin.fo HB: ALEKSANDAR STANKOV GEVST Í HB