hósdagur 4. oktober 2018síða 9

FRÍGGJADAGUR 5. OKTOBER 2018 SOSIALURIN 115 9 Atlantsflog fær ein nýggjan Airbus – Atlantic Airways undirskrivað avtalu um næsta spildurnýggja Airbus 320neo A tlantic Airways og amerikanska felagið, Air Lease, skrivaðu mikudagin undir sáttmála um, at Atlantic Airways langtíðarleigar enn eitt spildurnýtt Airbus A320neo flogfar. Føroyska flogfelagið yvirtekur nýggja flogfarið á vári 2020. Fyrr í ár varð avtala gjørd við sama felag (sí mynd) um leigu av spildurnýggjum Airbus 320neo, ið verður latin felagnum komandi vár. Airbus A320neo flogførini, ið taka 174 ferðafólk, hava lægri oljunýtslu og lægri CO2 útlát enn verandi Airbus flogførini. Nýggju flogførini verða, eins og verandi flogfør, útgjørd við framkomnu navigatiónstøknifrøðini frá Airbus, RNP AR 0,1, ið seinastu árini hevur bøtt munandi um reglusemið hjá felagnum til og úr Vágum. Við nýgg ju A320neo flogførunum, og størri hotell kapasiteti í Føroyum, er Atlantic Airways til reiðar at taka ímóti vaksandi ferðavinnuni, samstundis sum beinleiðis ferðamøguleikar til og úr Føroyum gerast fleiri og fjølbroyttari. Atlantic Airways hevur í dag trý Airbus flogfør í flotanum – eitt A320 og tvey A319. Av teimum eigur felagið A320 flogfarið og eitt A319. Triðja flogfarið av slagnum A319 er langtíðarleigað, og tað verður latið aftur í 2019, tá ið fyrsta Airbus A320neo flogfarið kemur í flotan. Fyri góðum tveimum árum síðani keypti Atlantic Airways A320 flogfarið, sum var bygt til føroyska flogfelagið, umframt tvær nýggjar tyrlur av slagnum AW139. Tá flotin er dagførdur við nýggju Airbus A320neo flogførunum, verður miðalaldurin á flogførunum einans hálvtriðja ár og miðalaldurin á tyrlunum fýra ár. Atlantic Airways hevur sum sítt fremsta mál at knýta Føroyar at umheiminum til frama fyri føroyingar og føroyska samfelagið, samstundis sum rutunetið eisini gevur útlendingum fleiri møguleikar at vitja Føroyar. Taka fíggjarligan stuðul frá føroyingum sum arbeiða uttanlands Føroyingar, sum arbeiða uttanlands, skulu ikki longur fáa stuðul til dupult húsarhald. Tað er endamálið við einum uppskoti, Kristina Háfoss, landsstýriskvinna í fíggjarmálum, hevur lagt fyri Løgtingið.  ÁKI BERTHOLDSEN F øroyingar sum hava familju, men sum mugu flyta heimanífrá at arbeiða, og sostatt hava tey húsarhald, fáa rætt til stuðul fyri dupult húsarhald. Hetta er eisini galdandi fyri teir føroyingar, sum arbeiða uttanlands. Men nú vil Kristina Háfoss hava Løgtingið at samtykkja, at hereftir skulu føroyingar, sum arbeiða uttanlands, ikki longur fáa stuðulin. Tað merkir, at hereftir verður stuðul fyri dupult húsarhald bara latin til tey, sum mugu flyta aðrastaðir í Føroyum at arbeiða, tí tað er so óhøgligt at búgva heima. Ella við øðrum orðum skulu bæði húsarhaldini hereftir vera í Føroyum. – Hetta er fyri at leggja dent á, at endamálið við lógini er at tryggja, at tað skal bera til hjá fólki í Føroyum at búgva og arbeiða kring alt landið, sigur Kristina Háfoss. Men higartil hevur tað verið ein treyt, at talan er um gift fólk, sum kunnu fáa stuðul til dupult húsarhald. Men hereftir verða sambúgvandi og gift, javntsett, so eisini fólk, sum hava búð saman í longri tíð, kunnu fáa stuðulin. Tað merkir, at tey skulu hava búð saman sum hjún í minst 18 mánaðir.  Hesi seinastu árini hava tað verið 115 – 125 fólk, sum hava fingið stuðul til dupult húsarhald. Men Kristina Háfoss upplýsir frá Taks, at umleið 90 prosent av teimum eru fólk, har annað húsarhaldið er uttanlands, og tey missa sostatt stuðulin nú.  Tilsamans hevur stuðulin verið umleið eina millión um árið, so verður hetta uppskotið samtykt, fer landskassin at spara einar 900.000 krónur.