hósdagur 20. desember 2018síða 15

FRÍGGJADAGUR 21. DESEMBER 2018 SOSIALURIN 148 15 Íblástur til jólafilm? Her eru sjey góðir jólafilmar F lest øll hava onkran film, sum tey serliga seta í samband við jólini. Jólafilmar eru sum heild elskaðir, tí teir so væl kunnu spreiða tann góða jólastemningin til hyggj­ararnar. Tí spíla sjónvarpsrásir og stroymingstænastur seg av álvara út við at vísa jólafilmar hesa tíðina. Um tú manglar íblástur til ein film á jólum, kanst tú umhugsa hesar sjey filmarnar, vit hava valt út. Nakrir av filmunum eru nýggir, meðan aðrir eru eldri klassikarar. HOME ALONE Eingi jól uttan Home Alone Um tú ert føddur í 80’unum ella 90’unum, so er stórur kjansur fyri, at tú setir Home Alone í samband við jólini. Í filminum fylgja vit dreinginum Kevin McCallister, sum við sínum eyðkenda andlitsbragdi tekur okkum øll við sær í sínum uppreistri ímóti tjóvunum, sum vilja ræna húsini hjá Kevin, meðan foreldur hansara eru burtur. Kevin er snildur, og ferð eftir ferð megnar hann at fáa tjóvarnar at standa sum kánus. Um tú ikki fært nokk av ævintýrinum hjá djarva og ráðaklóka Kevin, eru ráð fyri tí, tí hetta er bara fyrsti filmurin av fýra Home Alone filmum. Hesin fyrsti Home Alone kom út í 1990. THE GRINCH Grinchurin ger comeback í teknifilmi Søgan um Grinchin, som vildi stjala jólini, kann eftir hondini teljast millum mest elskaðu jólasøgurnar nakrantíð. Filmurin kom út í ár 2000 við Jim Carrey í høvuðsleiklutinum sum tað súra og allíkavæl humoristiska grøna trøllið. Jólastemningur er ikki akkurát tað, sum setur dám á Grinchin, men hann setur í øllum førum sín heilt serstaka dám á jólini í heimbýnum. Um tú hevur sæð klassikaran ov ofta, so eru góð tíðindi til tín. Grinchurin hevur nevniliga gjørt eitt comeback í spildurnýggjum teknifilmi, har hann saman við hundi sínum, Max, aftur hevur sum mál at oyðileggja jólini í býnum, Whoville. Hetta er ein nýggj alternativ útgáva av filminum frá 2000. DÓLGARNIR Allir føroyingar eiga dólgarnar Tað eru nú 32 ár síðan, at vit á fyrsta sinni lærdi dólgarnar at kenna í jólakalendaranum hjá Sjónvarpi Føroya. Teir tríggir Bjørn, Berint og Bjarni hava veruliga litað ein part av barndóminum hjá mongum føroyingum, sum vuksu upp síðst í 80’unum. Tað var Zacharis Hammer, sum savnaði sjónleikararnar Ega Dam, Erling Eysturoy og Hans Jacob Hermansen saman, tá sendirøðin, sum í dag er føroysk fólkaogn, skuldi gerast í 1985. Tað eru 19 partar av Dólgunum, og teir kunnu allir síggjast ókeypis á heimasíðuni hjá Kringvarpi Føroya undir síðuni “Vit”. THE POLAR EXPRESS Ein minnilig tokferð Familjan ger alt fyri at sannføra lítla Billy um, at jólamaðurin er til. Men tað fellir honum ikki lætt at finna trúnna á stóra mannin í reyðum. Men jólaaftan steðgar eitt tok í havanum, og Billy verður bjóðaður at stíga umborð. Her fer hann saman við øðrum børnum á eina ævintýrliga ferð til Norðurpólin fyri at vitja tann, sum hann annars ikki trúði uppá - jólamannin. Veruleiki og fiktión smelta í álvara saman í hesum filminum, tí hann er animeraður við mimikki og rørslum frá veruligum sjónleikarum, eitt nú Tom Hanks. The Polar Express er frá 2004. THE NUTCRACKER AND THE FOUR REALMS Ein nýggjur Disney klassikari? Tann unga Clara endar í einum gandakendum heimi, sum er deildur upp í fýra ríkir. Her møtir hon einum hermanni og nøkrum músum, og saman fara tey á eina serliga ferð fyri at leita eftir einum dýrabarum skatti. Í høvuðsleiklutinum síggja vit Mackenzie Fo, og eisini eru Morgan Freeman Keira Knightley við í filminum, sum Disney gav út fyrst í november í ár. EITT ORDANS JÓLABALL Julefrokosten Tá mann tosar um danskar jólafilmsklassikarar er tað bæði synd og skeivt ikki at tosa um skemtiliga Julefrokosten frá 1976. Her verða vit bjóðað inn til jólafrokostin hjá fyritøkuni, Simonsens Bijouterifabrik, og har gongur ikki stilt fyri seg. Lagið á starvsfólkunum verður betri fyri hvørja øl, og aftaná fleiri smakkir verður alt smædnið og afturhald gloymt burtur – og tá verður einki pakkað inn. Sjónleikarar eru m.a. Lisbet Dahl, Preben Kaas og Jørgen Ryg. THE CHRISTMAS CHRONICLES Nýggjur filmur um jólamannin Nýggi amerikanski filmurin The Christmas Chronicles er eitt gott boð uppá ein hugnaligan jólafilm, sum snýr seg um jólamannin. Jólamaðurin verður jagstraður av einum mystiskum sysktinapari og endar í nøkrum ógvuliga skemtiligum støðum í nýmótans heiminum við selfies og øðrum. The Christmas Chronicles kemur frá sama framleiðara, sum framleiddi Home Alone. Kurt Russel hevur høvuðsleiklutin, og filmurin varð tøkur á Netflix 22. november í ár.