hósdagur 21. februar 2019síða 8

FRÍGGJADAGUR 22. FEBRUAR 2019 SOSIALURIN 22 8 Eiga ikki røttu tólini Í januar hvarv eitt privat­ flogfar við argentinska fótbólts­ leikara­num, Emiliano Sala, og flogskiparanum, David Ibbotson, í Ermarsundi. Aftaná at hava leitað eftir vrakinum til fánýtis í nakrar dagar, bleiv flogfarið funnið fyrst í februar. Ein rov, sum er ein fjarstýrdur undirvatnsrobottur við myndatóli, fann flogfarið, sum við myndum staðfesti, at annar maðurin var umborð. Síðani fóru myndugleikarnir eftir honum. Palli á Dul undrast yvir, hví føroysku myndugleikarnir ikki hava líknandi tøkni tøka til líknandi støður. - Hatta var á Ermasundi, og tað vóru einir 18 kilometrar til næstu oyggj, og mann fann hann allíkavæl. Vit lógu í Skopunarfirði á einari kendari positión, har tað er tætt við land bæði til Hestoynna og Sandoynna. Men allíkavæl fáa vit einki gjørt við tað og funnið vinmannin hjá mær, tí vit ikki eiga tólini til tað. Tað er tað, sum er so ræðuligt, sigur Palli á Dul. Men mann royndi kortini at leita í Skopunarfirði. Eitt trol bleiv riggað til, og so fóru tveir trolarar út at trola eftir bátinum. Teir fingu hann langt upp, men mistu hann á botn aftur. - Tað hevði verið nógv lættari, um mann sendi ein rov niður fyri at kanna, um maðurin enn var í bátinum, og so kundi mann tikið støðu til, um fleiri royndir skuldu gerast. Tað pínir meg, at vit ikki eiga sovorðni tól. Vit eru ein siglandi tjóð. At vit ikki eiga tey amboð, sum skulu brúkast til bráðfeingishjálp her og nú, skilji eg ikki, sigur Palli á Dul. - Eg veit væl, at tíðin hjá Leo er farin, og at hann ikki kemur aftur. Men nú hugsi eg um framtíðina, tí ólukkur henda jú viðhvørt, tíverri. Tað hendir seg eisini, at persónar yvirliva í einum luftlumma undir vatni. Tá møguleikin fyri bjarging er har, so eigur mann at gera alt fyri at tryggja sær, at fólk sleppa uppá land aftur, um tey eru druknað, sigur hann. Skilji ikki eg yvirlivdi Tað er nú hálvtannað ár síðan ólukkuna. Palli á Dul hevur fingið sálarliga hjálp fyri at koma víðari frá sorgini og skelkinum, og annars heldur gerandisdagurin hjá honum fram sum vanligt. Hann hevur keypt sær nýggjan bát, sum eisini hevur fingið navnið Mars, men hann heldur seg ikki til enn at fara á flot síðan túrin í Skopunarfirði. Í dag hevur Palli á Dul torført við at skilja, hvussu hann yvirhøvur kom heilskapaður burtur úr ólukkuni. - Eg skilji tað simpulthen ikki, at eg sum næstan 70 ára gamal kundi klára næstan 40 minuttir í sjónum. Eg átti ikki at havt klárað tað og veit ikki, hvar eg fekk alla orkuna frá. Har hava hægri maktir verið uppií, sigur Palli á Dul. Í Havarikommissiónini, sum er kanningarmyndugleikin fyri ólukkur á sjónum, stendur, at vanliga viðmæla tey øllum at vera í bjargingarbelti. - Men tað, at eg ikki var í bjarginarbelti, bjargaði mínum lívi. Um eg hevði verið í bjargingarbelti, so hevði eg beinanvegin flotið upp undir stýrihúsdúrkið. Eg missi svøvnin, tá eg hugsi um, hvat hevði hent, um eg kom upp undir bátin. So veit eg ikki, um eg hevði sloppið út aftur, sigur Palli á Dul. Tað stendur eisini í rapportini um ólukkuna, at av tí, at Palli ikki var í bjargingarbelti, yvirlivdi hann. Tað hevði Havarikommissiónin fingið kritikk fyri, men tey stóðu við tað, tí tað var rætt í hesum føri, sjálvt um tey ongantíð vilja viðmæla fólki ikki at vera í bjargingarbelti. PATURE@SOSIALURIN.FO PERSÓNSSØGA: Palli á Dul Hetta var Mars. Tað eydnaðist ongantíð at fáa bátin upp aftur - Eg skilji ikki, at eg sum næstan 70 ára gamal kundi klára næstan 40 minuttir í sjónum