hósdagur 25. juli 2019síða 25

FRÍGGJADAGUR 26. JULI 2019 SOSIALURIN 85 25 Komandi partur Nú er túrurin við at gerast langur og heimferðin nærkast. Eisini fáa teir eina pingvin um okkum. Ein stór grind hevur ligið og malið rundan um skipið allan dagin. 18. januar fingu vit bara tveir hvalir at arbeiða okkara vakt. Teir vóru lidnir kl. 3. Vit høvdu so einki at gera fyri enn kl. 6, tá kom ein bátur við trimum hvalum. Tað lukkaðist okkum at fáa ein av teimum lidnan, áðrenn vit fingu frívakt. 20. januar var gott veður. Arbeiðið var støðgað tríggjar tímar av teirri orsøk, at tann veirurin. sum hvalirnir hingu uppi í aftan í skipinum, var komin um skrúvuna. Tá hann at endanum var leysur, mistu vit hvalin. Ein bátur kom tá við einum finnhvali. Hann tók hin hvalin, sum var slitnaður. Tað hevði verið missur í honum, tí hann var 90 føtur langur og hartil feitur. Tveir aðrir veirar slitnaðu undir arbeiðinum í dag, so vit vóru illa fyri at arbeiða í dag. Nú er samla veiðan 213 hvalir. 22. januar var bert ein hvalur til at arbeiða, tá vit fingu deksvakt. Síðani tá var lítið og einki gjørt á dekkinum. Dekkið var ruddað, og trossar gjørdir klárir til at binda tankbátin saman við “Willem Barendsz”, tá ið hann kemur. 23. januar. Ein hvalur kom á dekkið, sum "Am.5" hevði havt til fríholt í tveir dagar. Hann var kavrotin. 24. januar kom fleiri hvalir, so tað var nokk av arbeiði allan dagin. Tíðliga um morgunin kom tankbáturin frá Cape Town. Hann hevði 18 mans við sær til "Willem Barendsz”. Hann hevði eisini post við til hollendararnar. 25. januar var farið at sigla longur inn í ísin. Tankbáturin “Nacella” fylgdi við okkum. Seinnapartin var støðgað. "Am.7" kom við trimum spermum. Teir vóru hongdir til fríholt millum skipini. Tað var byrjað beinan vegin at pumpa oljuna umborð. 26. januar var arbeitt allan dagin við at lossa ymiska útgerð umborð á “Willem Barendsz”. Veðrið var av tí allarbesta. So langt, sum eygað sá, var ísur uttan um okkum. Tað var alt smáur ísur, einkult stór stykkir. 27. januar. Í gjár fór Palle Frederiksen umborð á tangabátin. Hann skal heim við honum til Hollands. Ein hollendari fór umborð samtíðis. Hann hevði eisini skaða í beininum. Fimm menn fóru umborð á tangabátin fyri at reinsa tangarnar og gera teir klárar at koyra olju í. Kl. 10 um kvøldið fór tangabáturin frá "Willem Barendsz” til næstu havn at leggja seg har, til hann var klárur at sigla heim aftur. 29. januar var arbeitt sum vanligt til kaffitíð. Tá var eingin hvalur eftir. Kl. 3,30 kom "Am.6" á borði við maskinmeistaranum. Hann var komin til skaða av umstýringini. Hann hevði bløtt illa út gjøgnum oyra. Hvussu hann fer at klára seg er ivingarsamt. Hann hevði mist vitið og var ikki raknaður við aftur okkara vakt. Kl. 2 fóru vit at sigla út úr ísinum. Tað er nógvur vindur og hartil kalt. 30. januar var arbeitt við at gera ymiskan reiðskap til á dekkinum. Kl. 4 kom ein bláhvalur, og hann arbeiddu vit lidnan, til vit fingu frívakt. Tað hevur verið óveður í dag. 31. januar var arbeitt við at spleysa veirar til at binda hval við til skipið, og vit fóru at bera harpunir upp á dekkið til at koyra umborð á bátarnar, tá teir komu aftur at bunkra. Tað var farið at sigla inn aftur í ísin í dag. 2. februar var sunnudagur. Tá var nógv at gera allan dagin. Tað kom hvalur eftir hval allan dagin. Veðrið var av tí allarbesta. Í dag kom tangabáturin aftur til skipið. Hann hevði verið við olju til eitt annað kókarí. Eitt russiskt kókarí var tætt hjá okkum í dag. Brúkti kjaft, koyrdur í land 4. februar var nógv arbeiði allan dagin. Tað russiska kókaríið var tríggjar fjórðingar frá okkum í dag. Tann fyrsta dagin, teir royndu her suðuri, fingu teir 15 hvalir. Tað var ein góður dagur fyri teir. "Am.7" er boyubátur. Hansara arbeiði er at taka hval frá hinum bátunum og sleipa teir til skipið og at vera til reiðar, um skipið skuldi trongt til hann. Arbeiðsmaðurin hjá okkum á reisuni frá Amsterdam til Íshavið, ein norðmaður, sum kallaðist Hansen, er í dag koyrdur umborð á tangabátin við pakk og sekk. Orsøkin er tann, at maðurin var ómøguligur og óbrúkiligur og brúkti altíð kjaft móti sínum yvirmonnum. 5. februar var lítið gjørt, tó at fleiri hvalir hingu aftan í skipinum. Tað kom av, at teir tóku ein stóran bláhval upp, og sveivurin slitnaði av honum. Tað gingu fleiri tímar, áðrenn teir fingu hann upp á dekkið. Teir máttu seta tríggjar veirar á hann. Hann var 90 føtur langur og øðiliga feitur. 7. februar var ikki nógv av arbeiði. Vit fyltu tveir pottar á afturdekkinum. Síðani tóku vit tríggjar spermar upp og flensaðu teir, skóru høvdini av og koyrdu restina yvirborð. Tá vit fingu frívakt var reint dekk. 8. februar var nógv av arbeiði allan dagin. Vit lógu allan dagin undir einum ísstykki, sum kundi vera ein hálvan fjórðing til longdar og púra slætt omaná. Tað átti at vera einar 200 favnar høgt. 10. februar gekk arbeiðið heldur seint á afturdekkinum allan dagin av teirri orsøk, at tað vóru flensaðir so nógvir hvalir, at teir kláraðu ikki at taka undan á fordekkinum. 11. februar. Tíðliga um morgunin kom tangabáturin á borðið, og tað var beinan vegin byrjað at pumpa hvalaolju umborð í hann. Í gjár kom "Am.3" á borðið við maskinskaða. "Am.7" liggur tætt hjá skipinum við 10 hvalum uppi í sær, sum hann hevur tikið frá hinum bátunum. 13. februar høvdu vit okkara fyrstu náttarvakt. Veðrið var av tí besta, og væl gekk at arbeiða, tó at tað ikki fall so væl fyri sum um dagin, tí vit máttu brúka lummalykt at lýsa við, meðan vit arbeiddu við pottarnar. 14. februar var nógv av arbeiði alla náttina. Vit fyltu 10 pottar á okkara vakt. Um dagin var ein hvalur tikin upp, sum var 92 føtur langur og hartil feitur. 15. februar var arbeitt sum vanligt alla náttina. Tað sóust nógv stór ísstykkir uttan um skipið. Veðrið var av tí allarbesta. 16. februar gekk arbeiðið spakuliga alla náttina. Fyri tað fyrsta vóru eingir pottar tómir, og tá ið teir til endan vóru tómir, var einki spik at koyra í teir. Vit fyltu tó upp í 9 pottar. Eftir sum arbeiðið gekk var tað nógv. 17. februar var nógv av arbeiði alla náttina. Tað var mest finnhvalir, sum vit arbeiddu. Teir eru væl feitari nú enn fyrsta vit byrjaðu at skjóta teir. Framleiddu 1000 føt av lýsi um samdøgrið 19. februar byrjaði náttin við fínasta veðrið og endaði við óveðrið. Tað var ónossligt at arbeiða. Bæði vindur og kavarok. Hesar seinastu dagarnar hava bátarnir skotið fleiri bláhvalir. Teir framleiða okkurt um 1000 føt av hvalaolju um samdøgrið. 20. februar varð arbeitt alla náttina. Tá frívaktin kom at enda, var eingin hvalur eftir uttanborðs, og á flensidekkinum var lítið eftir av arbeiði. Tveir hvalir lógu flensaðir. Tað var alt, sum eftir var á dekkinum. Veðrið er so ringt, at bátarnir fáa ikki skotið hval í dag. 21. februar. Veðrið var tó ikki verri enn so, at allir bátarnir komu við hvali. Tað var tó alt finnhvalir. Í nátt lá eitt annað kókarí so nær hjá okkum, at vit sóu ljósini hjá teimum. Tað er so tjúkt í toku, at tað gongur illani hjá bátunum at finna til skipið við hvalunum, tó at sirenan ýlir í heilum. 22. februar var gott veður. Tað komu bert tríggir hvalir. Teir vóru lidnir at arbeiða teir kl. 4. Tá fingu allir frí. Dagvaktin hevði ongan hval. Hon hevði frí allan dagin. "Am.4" kom upp á síðuna í nátt við maskinskaða. "Am.3" er besti bátur. Hann hevði 100 hvalir í alt. So stór vóru kjálkabeinini. Myndatakari J.P. Strijbos Byrjað verður at skera upp. Maðurin fremst á myndini geva eina ímynd av støddini á hvalinum. Myndatakari Hannes de Boor Sjey føroyingar á dekkinum á móðurskipinum. Uttast frá vinstru eru Martin Tórgarð, Johan við Stein, kallaður Polluks. Í miðjuni er Marius Kamban, næstur honum høgrumegin er Richard Nybo. Hvørjir munnu hinir vera?