mánadagur 30. september 2019síða 16

Mánadagur 30. september 2019 · Nr. 112 16 Sosialurin Hugskot og viðmerkingar – send sms til 225000 Søgur hava eina tíð gingið um, at Lars Olsen møguliga fór at leggja frá sær, men tað kom eitt sindur óvart á, at hann eftir landsliðsúttøkuna í morgun boðaði frá, at hann nú gevst sum landsliðsvenjari, nú hendan undankappingin verður liðug í november. – Mær hevur dámað væl at verið her. Tað kennist tó bæði gott og keðiligt. Hetta er tó ikki nøkur avgerð, ið er tikin frá degi til dags. Eg havi hugsað um tað í eina tíð, sigur Lars Olsen. – Eg haldi, at ein stór menning er farin fram á landsliðnum, síðani eg byrjaði. Men síðsta árið hava vit tó manglað at sæð eina framgongd, so at vit eisini hava kunna fingið stig á kontoina. Fótbóltsspælið hevur tó verið gott í allar flestu dystunum, sjálvandi hava vit havt onkran ringan hálvleik – tað hendir og serliga hjá smáum fótbóltstjóðum – men tað skuldu eisini komið nøkur stig, og tað havi eg saknað. Og eg haldi at FSF hevur hugsað nakað tað sama. Kanska skal nakað av nýggjum blóði til, nýggj hugskot og so víðari, sum sjálvandi skulu koma frá einum nýggjum venjara, sigur Lars Olsen. Fingið ov fá mál Lars Olsen er glaður fyri tey átta árini, hann hevur staðið á odda fyri føroyska A-landsliðnum. – Tað hevur verið ein succes. Júst tí at vit byrjaðu við null, skilt á tann hátt, at vit skuldu byrja at spæla fótbólt, og nógvir ungir spælarar komu við, sum síðani hava fingið nógvar royndir. Hetta sæst í teirra spæli. Eg haldi, at liðið hevur ment seg sera nógv. Men nú er tíðin komin at taka nýggjar avgerðir, men tað er eisini nakað av tí, sum eg haldi vera tað truplasta. Vit hava havt alt ov nógvar møguleikar at gera tey málini, ið vit vilja hava, og so hava vit eisini latið ov nógv mál farið ígjøgnum hjá okkum í síðstuni. Tá ið mótstøðulið sleppa at skora fýra ferðir móti okkum, so er trupult at vinna nakran dyst, sigur Lars Olsen. Við sorgblídni Tað er við ymiskum kenslum, at hann sigur farvæl til føroyskan fótbólt eftir skjótt átta ár her í Føroyum – Eg havi verið glaður fyri at verið her. Eg havi verið nógvar dagar í Føroyum – havi tó ikki gjørt tað upp – havi sum oftast gist á Hotel Føroyum. Sjálvandi er tað við sorgblídni, men vit vita, at alt fær ein enda. Lívið heldur heldur á, eisini í morgin. Fótbóltur er eisini ein ferð, og tað er sjáldan, at ein er so leingi á sama staði. Átta ár er leingi at vera á einum staði, sigur landsliðsvenjari. Eingi onnur tilboð Hevur tú fingið onnur tilboð? Ella er tað bara tín egna avgerð at gevast nú? – Eg havi øll hesi árini veri settur í samband við okkurt annað lið. Nei, tað er ikki nakað annað ítøkiligt tilboð. Hetta er er mín egna avgerð. Eg haldi, at FSF hevur somu hugsanir. Tí haldi eg, tað er best bæði fyri meg og fyri FSF, at eg fari at leita eftir onkrum øðrum. So má tíðin vísa, hvat tað verður, sigur Lars Olsen. Vónar at fáa stig Hvat hendir í komandi fýra dystunum, har tú hevur ábyrgd fyri liðnum. Verður nú spælt eftir hjartanum? – Vit taka tað eins álvarsamt, sum um eg hevði hildið fram. Eg vóni, at vit fáa nakrar góðar dystir. Eg kann ikki lova nakra sigur, men vónandi fáa vit nøkur stig. Tað vilja vit stríðast fyri, eins og í øllum øðrum dystum. At ein nýggjur venjari kemur næsta ár, mugu spælararnir taka seinni, sigur Lars Olsen. Føroyska A-landsliðið hjá monnum hevur fýra dystir eftir i hesi undankappingini. Teir vera móti Rumenia og Malta á heimavølli, og móti Norra og Svøríki á útivølli. KENSLUBORIN LARS OLSEN LEGGUR FRÁ SÆR FÓTBÓLTUR Tað var ein kensluborin Lars Olsen, A-landsliðsvenjari tey seinastu átta árini, sum í morgun boðaði frá, at hann gevst sum landsliðsvenjari Nýggi venjarin verður útlendingur Starvið sum venjari fyri føroyska landsliðið er eitt væl umtókt starv, ið hevur stóran áhuga úti í heimi. Tí hevur Virgar Hvidbro, aðalskrivari í Fótbóltssambandinum, góðar vónir fyri, at tað fer at eydnast at finna ein góðan avloysara til Lars Olsen, nú hann gevst við ársenda. - Nú miðlarnir fara at bera boð í Danmark og Evropa, at Lars Olsen gevst, vænti eg at telefonirnar fara at ringja og teldupostar koma til FSF frá fólkum, ið ynskja at bjóða seg fram, sigur Virgar Hvidbro. Tað er eingin loyna, at úrslitini hjá landsliðnum ikki hava verið serliga góð í seinastu og aðalskrivarin ásannar eisini, at man í FSF ivaðist í, um man ynskti at leingja sáttmálan. - Tað var kanska lættari at leingja um sáttmálan seinast, meðan tað hesa ferð hevur verið eitt sindur torført, tí at úrslitini hava ikki verið so góð. Í samrøðunum við Lars var eisini greitt, at pílarnir byrjaðu at peika móti, at hetta fór at nærkast einum enda. Men eg haldi sjálvur, at hetta er ein virðiligur endi, sigur aðalskrivarin. Lars Olsen heldur fram sum venjari til ársenda, men enn er eingin freist sett fyri nær nýggi venjarin verður settur. - Vit hava vanliga eina venjingarlegu í mars og so byrjar Euro Nations kappingin í september. So vit hava rímiliga góða tíð, men vit ætla at gera eitt gott arbeiði, so vit ikki bara seta onkran, tí vit eru í tíðarneyð, sigur Virgar Hvidbro og leggur afturat, at talan verður um eina útlendska loysn. - Nýggi venjarin verður útlendingur, men spurningurin er hvønn leist vit velja. Lars Olsen var eitt stórt navn, ið kundi vísa á góð úrslit í Danmark og var liðskipari hjá Danmark í 92. Spurningurin er um vit skulu halda tað støðið ella fara eftir einum venjara, ið er á veg fram, sigur aðalskrivarin.