hósdagur 14. november 2019síða 10

FRÍGGJADAGUR 15. NOVEMBER 2019 SOSIALURIN 132 10 TEMA: Starvs- og listafólkalønir Listafólk, ið higartil hava fingið listafólkaløn RAGNHILD HJALMARSDÓTTIR HØJGAARD, Keypmannahavn, tekstillistafólk Ragnhild H. Højgaard er tekstillistafólk og arbeiðir við ull burturav. Hon hevur millum annað listprýtt Glasir og matstovuna Noma í Keypmannahavn. Hon skal eisini listprýða nýggja Hilton Garden í Havn. Mentanargrunnur Landsins sigur millum annað um Ragnhild Hjalmarsdóttir Højgaard: Hon tvinnar saman nýhugsan og siðvenju í hugtakandi listaverkum. Við sínum djúptøkna kunnleika til tilfarið megnar hon at endurnýggja siðbundna arvin frá teimum, ið undan fóru og at endurhugsa møguleikarnar hjá ullini. Listaverkini hjá henni vísa, at hon hevur skapandi evni á høgum stigi. Hon er í eini serstøðu, tí at hon arbeiðir við tí tilfeinginum, sum vit hava her í Føroyum og hevur stórar ætlanir um at gagnnýta okkara tilfeingi sum tann góða føroyska ullin er. CARL JÓHAN JENSEN, Tórshavn, rithøvundur Carl Jóhan Jensen telist millum royndastu rithøvundarnar í Føroyum. Útvið 40 ár hevur Carl Jóhan Jensen burturav starvast sum rithøvundur, og hevur hann latið úr hondum hópin av bókum, millum annað Ó - Søgur um djevulskap, Eg síggi teg betur í myrkri og Sær - ein fuglabók av gloymsku. Mentanargrunnur Landsins sigur millum annað um Carl Jóhan Jensen: Ritverkini eru á høgum listarligum støði, fjølbroytt og poetisk avrik, ið tilsamans hava eitt stórt bókmentaligt virði. Carl Johan Jensen hevur seinnu árini prógvað, at hann megnar at flyta seg, og stíltilvitað ganga nýggjar leiðir. Hansara rannsóknir lýsa okkara samtíðarsamfelag og menniskju, samstundis sum tað næra verður samantvinnað við tað fjara, tá nomið verður við lívsins stóru grundspurningar. BRANDUR PATURSSON, Tórshavn, myndlistamaður Brandur Patursson arbeiðir við skulpturum úr glasi og metalli, installatiónum, ljós- og videolist. Listin hjá honum er slóðbrótandi, ikki bert í Føroyum, men eisini í altjóða høpi. Mentanargrunnur Landsins sigur millum annað um Brand Patursson: Seinastu árini hevur Brandur Patursson víst, at hann hevur skapandi megi á høgum stigi. Hansara listaligu avrik vísa, at hann er í støðugari menning og hevur ein djúptøknan kunnleika til tilfarið, sum hann arbeiðir við. Samstarvið við kend glaslistafólk úti í heimi boðar frá spennandi møguleikum og úrslitum, bæði fyri Brand sum listamann og fyri føroyska listaheimin. BÚI E. DAM, Nólsoy, leiklistamaður Búi Egason Dam er sangari, sangskrivari og sjón­leik­ ari. Hann er millum annað kendur gjøgnum bólkin Budam. Hann hevur eisini verið sera virkin innan sjónleikin. Mentanargrunnur Landsins sigur millum annað um Búa E. Dam: Verkætlanirnar hjá Búa Egason Dam eru fjølbroyttar og ymiskar, men allar eru ítøkiligar og grundaðar á dygdargóða leiklist, sum er viðkomandi fyri føroyska áskoðaran eins væl og leikararnar. Alla tíðina er dygdargóða leiklistin fyri eyga, og lýkur Búi Egason Dam tí krøvini um, at verkætlanirnar røkka væl og virðiliga til øll 3 komandi árini. Bæði føroyska áskoðaranum og føroyska sjónleikinum at frama. KATRIN OTTARSDÓTTIR, Hedehusene, filmslistafólk og bókmentafólk Katrin Ottarsdóttir hevur drúgvar royndir sum yrkislistafólk, og hevur verið undangongufólk í føroyskari filmslist. Hon hevur greitt úr hondum fleiri filmar, millum annað Atlantic Rhapsody, Bye Bye Bluebird og Ludo. Hevur eisini skrivað yrkingasøvn og stuttsøgusøvn, millum annað Aftanáðrenn, 43 bagatellir og Eru koparrør í himmiríki. Mentanargrunnur Landsins sigur millum annað um Katrin Ottarsdóttir: Hon hevur lagt úr hondini fleiri verk, sum hava vakt ans og gjørt mun í føroyska samfelagnum. Tey eru skrivað á einum løttum og fangandi føroyskum máli. Ivaleyst ber til at siga, at bæði yrkingar og stuttsøgur hava viðgjørt viðurskifti millum m.a. børn og foreldur á ein bersøgnan og originalan hátt, sum hevur kenst frískligur í føroyska bókmentaumhvørvinum. Tekstillist Bókmentan Myndlist Leiklist Bókmentan/filmslist JENS L. THOMSEN, Innan Glyvur, tónlistamaður Jens L. Thomsen hevur fingist við tónleik og er kendur frá tónleikaverkætlanini Orka, ið er kend fyri heimagjørd ljóðføri og eitt serstakt sound. Hann hevur verið við í fleiri tónleikabólkum og á fleiri tónleikaútgávum, har hann eisini hevur tikið upp og ljóðblandað. Mentanargrunnur Landsins sigur millum annað um Jens L. Thomsen: Menniskja, náttúran, tøknin og Føroyar sýnast at vera miðdepilin í virkseminum og listarligu útsøgnini hjá Jens L. Thomsen. Ætlanirnar eru væl lýstar, listarliga stórfingnar, og somuleiðis nærverandi við ansni at tilfarsligum uppruna í tíð, rúmd og stað. Ætlanirnar ganga somuleiðis, í summum førum, inn í sjálvar tónleikaligu grundlutirnir. Vitanin um arbeiðið handan listaverkið fær serstakan týdning, og fremur at verkini fáa nærverandi týdning fyri lurtaran og áskoðaran. Tónlist