hósdagur 30. januar 2020síða 42

El-drivnar tvíkiljur eitt sindur frammi í tíðini - Eg bæði vænti og vóni, at tað eisini innan henda partin av flotanum sum frálíður verða góðar alternativar orkusparandi loysnir, sum eru grønari enn diesel, sigur Ólavur Asafsson Olsen, stjóri í KJ T að er tætt samstarv millum KJ og føroysku alivinnuna, og hetta er eisini avgerandi neyðugt, tá virkið á Kambsdali er ein so stórur veitari til hesa vinnu, bæði við tvíkiljum, aliringum og øðrum reiðskapi, sum alivinnan brúkar. - Tætt samstarv millum okkum sum framleiðara og alivinnuna hevur stóran týdning í menningini av útgerð og tøkni til eina alivinnu í heimsflokki. Tað sigur stjórin í KJ, Ólavur Asafsson Olsen. Hann vísir á, at KJ í løtuni er í holt við tvær tvíkiljur til Bakkafrost, sum skulu latast felagnum í summar, og seinni í heyst skal felagið eisini lata eina tvíkilju til Íslands. - Hetta verða bygginummur 55, 56 og 57. Haraftrat eru vit í løtuni í holt við at projektera størstu tvíkilju, vit nakrantíð hava havt í stoypiskeiðini. Hetta er ein tvíkilja, sum verður 20 metrar long og níggju metrar breið, men enn er hesin sáttmálin ikki undirskrivaður, leggur stjórin aftrat. Ikki beint um hornið Nú vit síggja, at norðmenn eitt nú byggja stórar brunnbátar við hybrid-loysnum sum drívmegi, har olja og el eru flættað, spurdu vit stjóran í KJ, um nakað røkist fyri, at vit skjótt fara at síggja fyrstu tvíkiljuna við einari el-ella hybrid-skipan. - Jú, hetta er ikki óhugsandi. Vit hava snakkað við okkara samstarvspartar og keyparar um hetta. Svarið hjá alivinnuni er: Komið við einari verkætlan, so hyggja vit positivt upp á hana. Ólavur Asafsson Olsen ásannar, at ein slík verkætlan kostar bæði tíð og pengar, og hon er rættiliga krevjandi. Stjórin heldur ikki, at tað høvdu verið teir stóru trupulleikarnir við alternativum og orkusparandi loysnum, um alibátarnir bara vóru brúktir til at sigla út til ringarnar við og hyggja, hvussu út sær. - Men, tvíkiljurnar eru vorðnar størri og størri, og tað eru bæði kranar og spøl eisini. Tað eru tung ting, sum skulu lyftast, og tá tú arbeiðir við tí tunga, brúkar tú eisini nógva orku, sigur hann. Ólavur Asafsson Olsen er avgjørt ikki negativur um at royna alternativar orkuloysnir, men hann ásannar eisini, at tað er rættiliga nógv virksemi í løtuni, og tað er trupult at fáa arbeiðsmegi til alt tað dagliga, sum skal fáast frá hondini. - Vit lýsa eftir fólki í heilum, men tað vísir seg at vera trupult. Í løtuni hava vit tískil einar 12-15 útlendingar at hjálpa okkum, sigur hann. Stjórin vísir á, at tvíkiljur við hybrid-skipan ikki nýtast at vera so langt burtur, men hann ásannar eisini, at tær stóru tvíkiljurnar við einari reinari el-skipan sum einastu drívmegi ikki eru beint hinu megin hornið, sum hann tekur til. Ung við íblástri Ólavur Asafsson Olsen vísir á, at KJ fyri eini tíð síðan hevði nøkur universitetslesandi og onkrar lærarar á vitjan. Flestu av hesum vóru úr smáum samfeløgum kring um okkum og longur burturi í heimi. - Hesi vóru komin heim til Føroya sum bólkur, men av ymiskum lærustovnum. Tey høvdu nevniliga arbeitt eitt sindur við tvíkilju, sum partvís ella øll verður rikin við alternativari orku. Tey útlendsku lesandi arbeiddu eisini saman við Fróðskaparsetri Føroya, meðan tey vóru her. Stjórin í KJ vísir á, at soleiðis, sum hann skilti, arbeiddi hesin bólkur av lesandi nokso málrættað við alternativum orkumøguleikum til tvíkiljur. - Tað eina kvøldið tóku tey saman um á einum tiltaki í Sjóvinnuhúsinum á Vestaru Bryggju. Ólavur Asafsson Olsen heldur, at hóast framløgurnar - sæð við eygunum hjá KJ – ikki beinleiðis vóru kollveltandi, so var hugburðurin hjá hesum ungu góður. - Tað er heldur ikki frítt, at framløgan hjá teimum lesandi fekk okkum at hugsa meira, og tað er slett ikki óvist, at íblásturin í Sjóvinnuhúsinum hetta kvøldið ikki kann geva okkum sum framleiðarum eitt skump í rætta endan. Tað er ikki altíð, at tað skal so nógv til, at tankar nørast og búnast, sum stjórin á KJ tekur til. Alternativir møguleikar Ólavur Asafsson Olsen avdúkar eisini, at KJ í eina tíð hevur arbeitt saman við einum útlendskum felag, har ymiskir alternativir orkumøguleikar eru umrøddir. - Eg vænti, tað verður trupult í tí tunga partinum av alivinnuni at arbeiða við tvíkiljum, sum bara skulu koyra upp á el, tí tað eru so nógvar og stórar uppgávur, sum krevja stóra orku, og skulu bátarnir brúka nógva orku, mugu teir eisini hava nógva orku. Hann vísir á, at eitt annað, sum eisini spælir inn, er, at hesir bátar ofta eisini arbeiða í vánaligum líkindum, nú alingin í fleiri førum liggur meira út til opið hav. - Men, eg bæði vænti og vóni, at tað eisini innan henda partin av flotanum sum frálíður verða góðar alternativar orkusparandi loysnir, sum eru grønari enn diesel, sigur Ólavur Asafsson Olsen. - Vit hava snakkað við okkara samstarvspartar og keyparar um alternativa orku til tvíkiljur. Svarið hjá alivinnuni er: Komið við einari verkætlan, so hyggja vit positivt upp á hana, sigur stjórin í KJ, Ólavur Asafsson Olsen TEKSTUR VILMUND JACOBSEN MYNDIR KJ Reportasja