hósdagur 25. juni 2020síða 44

Til skips við Gitte Henning 1 Granskingin hevur eisini ført við sær, at Sanna Laksá hevur verið onkran túr til skips. – Eg havi verið ein túr við Gitte Henning 1, umframt at eg eisini var eftir skipinum. Tað er fyri at læra um manna­gongdirnar umborð. Fyri meg er tað sera týðandi at skilja, hvat gongur fyri seg umborð, og eisini at betra um viðurskiftini, sigur hon. Ætlanin var, at hon skuldi við aftur, men vegna koronu­smittuna er tað útsett. – Er ein granskari einaferð, so heldur ein á at vera granskari. Tað er so týdningarmikið at framhaldandi arbeiða við menning, tí at vit liva av tí, sum havið gevur. Vit mugu hugsa longur fram enn bara at vit fara út at fiska í dag. Tað er mítt hjartamál, at vit mugu gagnnýta tilfeingið, sum er, og fáa sum mest burturúr tí, sigur hon. Menninir lurta – Eg havi ongantíð hildið, at fiskivinna hevur fylt so nógv í familjuni, sjálvt um nøkur í ættarliðunum frammanundan hava havt ymiskt við fiskivinnu at gera. Men nú eri eg brádliga blakað út í tað. Nú er alt fiskur, og eg gangi kaitúr og hyggi, hvør landar í dag. Tað er mega spenn­andi, sigur Sanna Laksá. – Fiskivinnan er nokk so nógv merkt av mannfólkum. Men tað er ikki bara fyri menn. Um ein hevur áhuga, so er ein hjartaliga vælkomin at vera har. Tað eru eisini fleiri møguleikar hjá kvinnum í fiskivinnuni. Og hon heldur, at tað verður lurtað eftir henni. – Ja, teir lurta merkiliga væl eftir mær. Eg havi als ikki upplivað, av tí at eg eri konufólk, at eg ikki verið vird. Um nakað, so verður tað lurtað betri eftir mær. Tað er huga­ligt, sigur hon. Granska í fiski- og alivinnu Eldra systurin, Unn Laksá, var liðug við sína phd í 2013, og hon fekk beinanvegin starv í Syntesa sum gransk­ari. Tað var eitt fantastiska spennandi umhvørvi at arbeiða í, har vit arbeiddu við tvørfakligum altjóða granskingar­ verkætlanum. – Eg hevði skrivað eina phd um veðurlagsbroytingar og miðling av tí. Meðan eg arbeiddi hjá Syntesa, var eg millum annað við í eini verkætlan, har vit kannaðu, hvussu veður­lagsbroytingar ávirka fiskivinnu og alivinnuna uttan um okkum. Hetta var ein størri verkætlan, sigur Unn Laksá. Hon hevur eisini arbeitt í verkætlan, har granskað varð, hvussu vit betri kunnu gagnnýta alt av botnfiskinum, tað vil siga eisini tað, sum vanliga verður blakað út aftur. – Livrar, høvd og annað verður blakað út aftur, men tað er virði í tí, og vit eiga at miða ímóti at kunnu gagn­ nýta tað í framtíðini. Nakað verður gjørt við at fáa hetta til lands og virðisøkja tað, men nógv kann gerast afturat, sig­ur Unn Laksá. Hon vísir á, at tað kostar at fáa hetta til lands, og íløgur mugu gerast fyri at fáa meira burturúr tí. – Mannagongdir mugu broytast og íløgur mugu gerast umborð og á landi, sigur Unn Laksá. Hon vísir á, at tørvur er at granska enn meira innan hetta økið. Vørumenning í fiski- og alivinnuni Nú er eldra systirin vorðin stjóri í nýggja gransk­ingar­ stovninum Sjókovanum, har tey granska innan burðar­ dygga menning og nýskapan innan fiski- og alivinnuna – Vit hava fleiri spennandi uppgávur fyri framman. Vit leggja dent á, at arbeiða við vørumenning í føroysku fiski- og alivinnuni. Vit vóna, at granskingin kann koma vinnuni til góðar, so at vit menna fiski- og alivinnuna enn meira, og at vit við granskingini kunnu vera við til at virðisøkja tilfeingið, føroyska samfelagnum at frama, sigur Unn Laksá. Nógv fiskaprát í familjuni Av tí at báðar systrarnar búgva í Syðrugøtu, síggjast tær ofta, og tá verður eisini prátað um fisk. – Til tíðir er nokk so fitt av fiskapráti í familjuni, men um fleiri onnur eisini eru har, so royna vit eisini at práta um okkurt annað, sigur Sanna. Tá ið tær eru saman við vinkonum, verður ikki prátað so nógv um fisk. – Eg haldi ikki, at kvinnur vanliga hava so stóran áhuga fyri fiski. Tað er meir nakað, sum menn práta um, sigur Sanna Laksá. Eg havi als ikki upplivað, av tí at eg eri konufólk, at eg ikki verið vird. Um nakað, so verður tað lurtað betri eftir mær Sanna Laksá arbeiðir sum búskaparráðgevi og granskari hjá Varðanum í Gøtu Unn Laksá arbeiðir sum stjóri í nýggja granskingarstovninum Sjókovanum