fríggjadagur 31. august 2007síða 25

25 tíðindi Nr. 168 - 31. august 2007 Hákun Steingrímsson er umboðsmaður hjá íslendska bankanum Landsbanki, ið telist millum teir tríggjar stóru bankarnar í Íslandi. Teir hava fyri ári síðani víðkað heimamarknaðin til eisini at umfata Føroyar, og hava nú lutfalsliga fáar, men stórar kundar í landinum BANKAVIRKSEMI Leo Poulsen leo@sosialurin.fo - Hví tað júst var eg, sum fekk bjóðað at gerast um- boðsmaður Landsbankans í Føroyum veit eg ikki. Tað mást tú spyrja onnur um. Soleiðis svarar Hákun Steingrímsson, tá vit spyrja hann, um tað er hansara kunnleiki til føroysku reiða- ríini sum hevur gjørt, at tað bleiv hann, ið fekk starv hjá íslendska bankanum. Sum kunnugt hevði Hák- un Steingrímsson verið leið- ari á sjóvinnudeildini hjá Tryggingarfelagnum Før- oyar, og má tí roknast at hava gott samband við før- oysku reiðaríini. Ikki tí. Landsbankin fæst við annað enn at fíggja virk- semi, ið er tengt at sjónum, men tað er fyrst og fremst sjóvinnudeildin hjá banka- num, sum víðkar sítt virk- semi til Føroya. Landsbankin hevði eitt ávíst virksemi í Føroyum framman undan, men tað var serliga avbjóðingin í sambandi við ætlaðu privati- seringarnar sum gjørdu, at íslendski bankin valdi at koma sterkari inn á før- oyska marknaðin fyri ári síðani. - Tað var serliga »Corpo- rate Finans«-deildin, ið ynskti at sleppa inn á mark- naðin í sambandi við at gera prospektir og annað í sambandi við privatisering- arnar, men tað bleiv ikki so nógv av tí, tá til stykkis kom. Men eisini í sambandi við Corporate Banking, tað vil siga tá tað kom til at lána pening í hesum sam- bandi, var áhugi frá ís- lendskari síðu, sigur Hákun Steingrímsson. Tað er nú gott og væl eitt ár síðani, at hann tók við starvinum sum umboðsmað- ur hjá Landsbankanum í Føroyum, og hann er væl nøgdur við gongdina higar- til. - Bankin leggur seg ser- liga eftir stórum kundum, omanfyri 10 milliónir helst. Tað er dýrt at flyta pening millum lond, og tí má upp- hæddin vera av einari ávís- ari stødd, fyri at tað skal løna seg, sigur Hákun Stein- grímsson. Stert ella kvotur Tá Hákun fyri góðum ári síðani varð settur í starv hjá Landsbankanum, var tað nógv, sum hann mátti seta seg inn í. - Eg eri jú ikki bankamað- ur av professión, so tað var ein rúgva at seta seg inn í. Ikki tí, eg havi ikki møtt so øgiliga mongum banka- monnum i mínum arbeiði. Hinvegin kendi eg jú mark- naðin fyri ein stóran part framman undan, sigur Hák- un Steingrímsson. Tað er fyrst og fremst tað, sum hevur við sjógvin at gera, sum Landsbankin er áhugaður í her á landi, men áhugi er fyri størri vinnu- fyritøkum í síni heild. - Bankin er áhugaður í øllum størri fyritøkum, men serliga teimum, sum hava við sjógvin at gera. Mann kann siga tað soleiðis, at er talan um stert ella kvotur, eru vit beinanvegin klárir, sigur Hákun Steingríms- son. Tað er kortini ikki soleið- is, at Landsbankin er í »heads-on« kapping við aðrar peningastovnar alla tíðina. - Tað kann eisini verða so, at tað eru uppgávur, sum aðrir peningastovnar ikki vilja taka upp á seg einsamallir, og tá kunnu vit so koma inn í myndina, sig- ur Hákun Steingrímsson. Men fyrst og fremst er tað altso skip og virkir, ið hava við sjógvin at gera, sum umboðsmaðurin hjá Landsbankanum í Føroyum tekur sær mest av. Stór útlán Deildin í Føroyum er ikki ætlað at verða ein rættilig bankadeild, men heldur ein umboðsskrivstova. - Eg skal bara taka mær av samskiftinum við kundar- nar, so tað er ikki neyðugt við fleiri fólkum á skrivstov- uni. Eg seti meg í samband við kundar, ella teir seta seg í samband við meg, og síð- ani geri eg eina innstilling til leiðsluna í Íslandi. Í hes- um elektronisku tíðum ber jú næstan alt til, sjálvt um fjarstøðan er stór, sigur Hák- un Steingrímsson. Hann sigur, at hann í so máta dúvar nógv meiri upp á íslendska baklandið, enn hann annars hevði gjørt, um tað hevði verið ein rætti- lig undirdeild í Føroyum. Annars heldur Hákun Steingrímsson ikki, at Landsbankin er áhugaður í at uppkeypa hálvalmennu føroysku feløgini, ið eru ella standa fyri at verða pri- vatiserað. - Mær vitandi hevur Landsbankin ikki keypt partabrøv í Føroya Banka ella Eik, og eg kenni ikki nakað til, at áhugi skuldi verið at keypt partabrøv í Føroya Tele ella Atlantsflog, tá tey verða partvís privati- serað. Men at teir kunnu hava fíggjað onkran, sum hevur ella ætlar at keypa partabrøv, tað kann sjálv- andi væl vera, sigur Hákun Steingrímsson. Hann er annars væl nøgd- ur við gongdina hjá umboðs- stovuni higartil. Landsbank- in hevur fingið nakrar kund- ar aftrat seinasta árið, og hóast talið á kundunum er lutfalsliga lítið, er talan um rættiliga stórar upphæddir. - Jú, eg haldi at tað er á einari leið. Vit hava nakrar hundrað milliónir í umfari í Føroyum, og tað meta vit vera nøktandi eftir tíðini, vit hava virkað á føroyska marknaðinum, sigur Hákun Steingrímsson. Nakrar hundrað millionir í umfari Hákun Steingrímsson er væl nøgdur við gongdina higartil. Landsbankin hevur havt umboðskrivstovu á føroyska marknaðinum í eitt gott ár nú, og teir hava nakrar hundrað milliónir krónur í umfari í Føroyum Mynd: Álvur Haraldsen Íslendski Landsbankin heldur til í Nólsoyarstovu