hósdagur 21. januar 2010síða 17

Nr. 14 - 21. januar 2010 17 Í kvøld eru júst 50 ár liðin síðan brandlúðrarnir í Havn ýldu, tí eldur var í Gamla Kommunuskúl­ anum hóskvøldið 21. januar 1960 Tað var umleið kl. 23 at fólk varn­ aðust, at eldur var í bygninginum. Tað var oysregn og stilli hetta kvøldið. Roykurin lá tættur niðan gjøgnum býin, og tað vardi ikki leingi, fyrr enn nógv fólk komu oman í býin at hyggja eftir hvat var áfatt. Ljósur logi stóð tá upp gjøgnum takið og út gjøgnum vindeyguni í vestara enda á bygninginum. Brandmenninir vóru skjótir á staðið, men tað tók nakrar tímar, til eldurin varð sløktur. Eftir at nýggi kommunuskúlin varð bygdur í Havn, var gamli skúlin nýttur til nógv ymisk endamál. Tekniska deild hjá býráðnum helt til har, læraraskúlin hevði eina stovu, eins og Havnar Horn­ orkestur og GHM hildu eisini til í skúlanum. Eisini helt Føroya Sparikassi til í skúlanum, meðan ein umbygging av sparikassabygn­ inginum fór fram. Skaðin var sera umfatandi. Havnar Hornorkestur misti alla sína útgerð, meðan GHM fekk bjargað tí mesta av sínari útgerð. Í eini stovu, har arbeitt var við býar­ planinum yvir Havnina, kolaðist alt upp. Skúlin var tryggjaður fyri 120.000 krónur, meðan útgerðin hjá Havnar Hornorkestri als ikki var tryggjað. Grundarsteinurin til Kommunu­ skúlan varð lagdur mánadagin 18. desember 1893, og sunnudagin 4. august 1895 var skúlin vígdur. Tað var Jákup Andreas Arge, van­ liga nevndur Jampan, sum stóð fyri grótlaðingini, og Dione Isak­ sen teknaði skúlan, sum samanlagt kostaði 38.000 túsund krónur at byggja. Í dag er Gamli Kommunuskúlin ráðhús hjá Tórshavnar kommunu. - mg Keldur: Sosialurin og Dimmalætting leygardagin 23. januar 1960 / Havnin – fólk og yrki 1900-1939 Fyri 50 árum síðan: Býarplanurin upp í royk nøvn Brandmenninir vóru skjótir á staðið, men tað tók nakrar tímar, til eldurin varð sløktur Í dag er Gamli Kommunuskúlin ráðhús hjá Tórshavnar kommunu