fríggjadagur 23. november 2012síða 46

nr. 137 · 23. november 2012 6 VIKUSKIFTI TIPS FRÁ barbaru barbara@sosialurin.fo At geva jólagávur kann mangan tykjast heldur eintáttað. Ein hevur kanska ikki stundir ella hugflog til at gera nakað øðrvísi, og tí vera tey vanligu tingini so sum skjúrtur, blusur, troyggjur og annað keypt á hvørjum ári. Men tað ber til at gera jólagávurnar stuttligari, og gera okkurt, sum kanska er eitt sindur øðrvísi. Her eru nøkur boð uppá jólagávur, sum bróta eitt sindur frá tí vanliga Myndir Vit eru í tí hepnu og løgnu støðu, at flest allar myndir okkara liggja á netinum so ella so. Tað merkir samstundis, at nógv okkara ikki nýta orku uppá at framkallað myndir, og hongja tær uppá veggin. Men veruleikin er, at einki er so stuttligt sum persónligar myndir, sum ein kann ganga framvið og síggja hvønn dag. Eitt hugskot er at velja júst tær røttu myndirnar út til tann, sum tú ynskir at gleða, og síðani prenta tær út frá Facebook ella aðrastaðni. Keyp eina vakra rammu, og tú hevur eina persónliga og stuttliga gávu, sum onkursvegna vísur, at tú hevur tikið tær stundir til at gleða viðkomandi. Eitt læruríkt kvøld Tað finnast ein ørgrynna av kvøldskeiðum – bæði longri og styttri, og allarhelst er okkurt fyri øll at finna í Føroyum. Um tað verður seg eitt skeið, har ein lærir at hekla, at sminka sær, at byggja eitt hvørt, at skriva rætt føroyskt ella okkurt annað, so er tað eisini ein stuttlig gáva at fáa. Eitt nú kann nevnast, at MakeUp Store í Havn bjóðar javnan kvøldskeið, har kvinnur fáa møguleikan at læra seg at nýta smyrsl, og er hetta eitt sera vælumtókt skeið. Men einans hugflogið setur markið, so hevur tú hug at geva eina læruríka gávu, so er at leita eftir kvøldskeiðum kring landið, sum hóska júst til tann persónin, sum tú ynskir at gleða. Eitt friðsælt vikuskifti Í øllum rokanum í okkara gerandislívið gloyma vit mangan at kobla úr. At sløkkja telefonirnar, teldurnar og sjónvørpini, og lata okkum koma í samband við náttúruna ella tey, sum vit eru best við. Kring alt landið ber til at leiga hús eitt vikuskifti fyri ein bíligan penga. Tak tann tú vilt gleða undir armin, og leiga eitt hús frá onkrari kunningarstovu í Føroyum, og hugni tykkum eitt heilt vikuskiftið uttan ófrið, tøknina og arbeiðslívið. Eina serstaka uppliving Mong okkara hava altíð ætlað okkum okkurt, sum vit tó ongantíð hava roynt. Tað verður seg alt frá síging til at vitja í Mykinesi, koyra í ATV'arum, vitja Vestmanna Bjørgini, sigla við Norðlýsinum til Kolturs ella okkurt heilt annað. Tú kanst gera tær nakrar tankar um hvat tann persónurin tú ynskir at gleða hevði dámt væl, og síðani givið viðkomandi eitt gávubræv uppá eina serstaka uppliving í jólagávu. Heilt avgjørt ein jólagáva, sum ongantíð fer í gloymibókina. Eina vælveruuppliving Um tú keypir gávur til mann ella kvinnu, so er vælveran altíð góð at hava í huga. Kring landið hava vit vælverustovur, sum bjóða alt frá serstøkum massagum til neglaáseting. Eg kenni frá mær sjálvari, at eg ikki altíð hugsi um at keypa mær sjálvari ein massagutíma, men hvørja ferð eg fari til slíkar viðgerðir, er tað balsam fyri sálina. Eitt hugskot er Thai-massagan, sum er í miðbýnum í Havn. Hendan viðgerðin sigst vera ógvuliga góð fyri kropp og sál, og er ikki so kostnaðarmikil. Eisini hevur eitt nú Cosmeto nógvar viðgerðir, sum kunnu síggjast á netinum. mynd: Kasper Solberg Øðrvísi jólagávuhugskot