hósdagur 4. september 2014síða 39

15 Mentanarblaðið hjá Miðlahúsinum 5 • 5. september 2014 nógv prosent eiga at fella til føroysku umsøkjararnar og ein kann ikki dúva uppá nakran ávísan talsmann fyri júst tína umsókn. Men um tín umsókn dumpar, so fær hon ikki eitt óendaligt “NEI” stempul; tú kanst, eins og um tú dumpar í støddfrøði í student, supplera við meira kunning, tillaga og betra umsóknina og so senda avstað einaferð, tvær ferðir ella tríggjar ferðir afturat. Ella finna handklæði fram. Stórsti einkulti trupulleikin, ið flestu umsøkjarar renna seg í er tíð. Grunnarnir báðir krevja, at søkt verður fleiri mánar frammanundan, tí verkætlanin skal ikki verða byrjað áðrenn stuðulsumsóknin er viðgjørd og svarað. Tískil má ein umsókn sendast í minsta lagi seks mánaðar frammanundan at verkætlanin skal fara at bakkastokki. Og skal ráð verða til eitt “NEI”, so skal umsóknin sendast minimum eitt ár frammanundan. Við okkara veiðumentaliteti í huga, er hetta ein av treytunum, sum føroyskir umsøkjarar hava torført at lúka. Í veruleikanum er einki hokus pokus í uppgávuni at søkja um stuðul úr norðurlendsku grunnunum. Er hugskotið gott og kjølfest í norðurlendskum mentanarsamstarvi snýr restin av arbeiðnum seg um at orða eina sannførandi verkætlanarlýsing og svara uppá teir spurningar, ið umsóknarblaðið setir. Harumframt skulu øll tølini fáast til vega; ein fíggjarætlan skal gerast við metingum av inntøkum og útreiðslum, og báðir grunnar krevja, at hon er realistisk og javnvigar. Um ein søkir frá Nordisk Kulturfond útihýsir tað ikki, at ein eisini kann søkja frá Kulturkontakt Nord og umvent, men grunnarnir tosa saman og vita av hvørjum øðrum. Ein frymil, ið brúktur verður er, at í mesta lagi 80% av einari verkætlan skal verða fíggjað úr norðurlendskum grunnum, og fyri at fáa írestandi 20%, má bankast á dyrnar hjá Mentanargrunni Landsins, og øðrum viðkomandi grunnum, stovnum og sponsorum. At fáa fyrsta stuðulin í hús er stórsta avbjóðingin, men tað hevur sera stórt signalvirði at stuðul er fingin til vega frá nationalum grunnum, tí tað prógvar, at verkætlanin er forankrað lokalt og at onnur trúgva uppá hana. EITT SINDUR AV YVIRFISKING Við hesum vælmeinandi ráðunum til møguligar nýggjar umsøkjarar, vendi eg aftur til byrjanina fyri at kanna, um føroyska veiðan eftir norðurlendsku mentanarkrónunum hevur verið burðardygg. Hygga vit eftir tølunum frá 2009-2013 vísir tað seg, at føroyskir umsøkjarir hesi fimm árini hava megnað at fiska 260.000 kr í miðal úr Kulturkontakt Nord, meðan talið er nakað hægri fyri Nordisk Kulturfond, nevnliga 286.200 kr í miðal um árið. Í prosent merkir hetta, at føroyskar umsóknir fáa 0,9% av teim 30 mill. kr í Kulturkontakt Nord, og 1,1% av teim 25 mill. kr í Nordisk Kulturfond. So her er eitt sindur av yvirfisking í mun til fólkatalið, tí Føroyar standa fyri 0,2 % av samlaða fólkatalinum í norðurlondum. Men hetta er jú bara turrislig tøl. Ágóðin av stuðlinum avmarkar seg ikki til Føroyar júst tí talan er um eitt norðurlendskt meirvirði. Hartil vísa kanningar, at fyri hvørja mentanarkrónu fær ein fimm aftur í virði. Tillukku til tín, kæri lesari, sum hevur megnað at lesa greinina á tamb uttan at fáa herindi av umsóknarvamli – tú hevur klárað fyrstu forðingina. MYNDIR: BIRGIR KRUSE WOYZECK<3MARIE (PLAKAT: HEIÐRIK Á HEYGUM) WOYZECK<3MARIE VERKÆTLANIN byrjaði í 2010 tá norska Ida Løken, svenska Öllegård Groundstroem og Kjartan Hansen møttust á Sjónleikahúsinum í Luleå har Kjartan lærdi til sjónleikara. Tey avtalaðu at arbeiða fram ímóti einum samarbeiði. Úrslitið gjørdist at føroyska palllistaliðið Det Ferösche Compagnie produceraði henda serstaka sjónleik, sum 9 norðurlendskir leikarar o.o. framførdu í Føroyum, Danmark og í Norra á sumri 2013. Næsta verkætlan "Äventyret" liggur fyri framman. LeikREAD 2013 (Frá LeikREAD venjing - Annika Johannesen(fo), Páll Danielsen(fo), Simon Boberg (dk) - myndafólk: Birita Malunardóttir) Ein internorðurlendskur reading festivalur har Leikarafelag Føroya annahvørt ár samstarvar við at promovera tað besta leikritið frá norðurlendsku londunum. Kjartan Hansen er verkætlanarleiðari og umboðar eisini Føroyar í felagsskapinum Nordisk Teater Union, ið eigur konseptið.