hósdagur 24. september 2015síða 20

Fríggjadagur 25. september 2015 sosialurin 110 20 Fyrsta fløguútgávan hjá evnaríka bólkinum, Punjab, ið ber heitið ”The Flying Elephant”, kemur sum eitt frískt lot inn í føroyska tónleikapallin, har tað serliga er saksofonin, sum slær fast, at hon hoyrir heima í funk/rokk tónleikastílinum Sigurjón Einarson D jass íblástur alternativur funk/rokkur er áleið nakað tað, ið hevur lýst orkuríku upplivingina frá ungu monnunum í Punjab, tá ymiskir tónleikastílir verða blandaðir saman í serliga lofthválvinum hjá tí flúgvandi fílinum – The Flying Elephant. Punjab, ið varð stovnaður í 2012, er mannaður við seks sera dugnaligum og gávuríkum tónleikarum, sum virka til longu hava vunnið sær pláss í hjørtunum á áhoyraranum, ið hava upplivað teirra vælspælda tónleik og orkufyltu framførslur á ymisku tónleikapallum kring Føroyar. Í seinastu viku kom so fyrsta fløguútgávan hjá bólkinum, ið hevur verið leingi ávegis, og lat tað verða sagt beinavegin; tekniska støðið á útgávuni er høgt, sera høgt, tá aldurin hjá hesum ungu monnunum verður tikin við. Limirnir í bólkinum liggja allir um tey 19 árini, men á útgávuni tykjast menn vera tvífalt so gamlir! Somikið væl samanspældir ljóða teir á útgávuni. Tað skulu bæði teir og musikkskúlin, ið hevur staðið fyri stórum parti av teirra tónleikauppaling, hava stórt rós fyri. Har liggja fleiri tímar í venjingarhølinum aftanfyri løgini á fløguni, ið eru innspæld beinleiðis í Studio Bloch, har Theodor Kapnas hevur staðið fyri upptøkunum og eisini ljóðblandað útgávuna. Løgini Talan er um sjey løg á fløguni, og longu við fyrsta lagnum, ið eitur “Flying Elephant”, fer flúgvandi fílurin á flog og tekur okkum við upp í hægru lofthválvina, har funkgittarin, góða røddin hjá Árna Johannesson og serliga saksofonin tekur fatur í teg sum áhoyrara og heldur tær uppi gjøgnum orkufylta tónleikin. Hetta er eisini galdandi fyri næsta sangin, “King and the Queen”, ið eisini er sera upbeat, har góð samanrenning er millum rødd, klaver, gittara, saksofon og slagverk. Hini løgini, ið fáa teg uppfrá, eru eitt nú “Hairy Woman”, ið higartil er kendasta lagið hjá Punjab, har teir eisini hava latið gjørt eitt videolag til saman við Polar Films Entertainment. Við hesum sanginum, tippir Punjab holið, ið varð eftirlatið eftir Boys in a Band, og sum rómin á lagkøkuni, hoyra vit eisini eitt deiligt 70-ara djassorgul í lagnum. Við “Old Man´s Pipe” verður ferðin sett eitt sindur niður, men her sleppa bassgittarin og saksofonin veruliga framat ljóðmyndini, har tey eru í hólmgongu við hvørt annað, ið tó er stýrd av sangarinum. “Run to You” er eins og eitt lag úr filminum, The Commitments, har gestablásarar sleppa framat at spæla eina løtu, eins og vit hoyra eina góða trompet-solo frá Ernst Remmel, ið spælir við bólkinum til størri tiltøk. Gestablásararnir eru eisini við í “Svart Djús”, ið hóast sítt føroyska navn eisini verður sungið á enskum. Aftur her fær saksofonin rúmd til at sláa seg leysa eina løtu, og eg kann ikki siga tað nóg ofta; tað liggur sera væl fyri hjá Matthias Kjølbro at leika á saksofonina. Maðurin og saksofonin eru sum eitt! Kann bert ímyndar mær, at hvørjaferð Matthias andar út, so er tað í eina saksofon. Tað fær ikki verðið øðrvísi! Við “Counter Closkwise” (Clockwise?) fær kremuta saksofonin tann flúgvandi fílin spakuliga niður á jørðina aftur, hóast sangarin og el-gittarin gera eina seinastu roynd at fáa fílin heilt upp at flúgva aftur, tekur saksofonin ræðið og sangarin og el-gittarin geva eftir, so fílurin fær eina bleyta lending. Við flúgvandi fílinum – The Flying Elephant – er Punjab veruliga farnir á flog. Tað verður spennandi at fylgja ferðini hjá hesum ungu snillingum. Teir hava prógvað, við hesi útgávuni, at saksofonin veruliga hoyrir heima í funk/rokk tónleikastílinum. Í stuttum kann sigast um útgávuna, at fílurin ongantíð missir flogið á fløguni. Vit hoyra, hvussu tað er hugsað yvir smálutirnar í sjálvum tónleikinum, men tá tað kemur til sjálvar tekstirnar á fløguni, haltar tað eitt sindur. Trupulleikin við fløguni kann kanska eisini blíva tann, at hon er OV gjøgnumhugsað, tí funk er um nakað ein stílur, ið er bundin saman við ta fysiska, og hetta kann ein lætt verða fremmandgjørdur frá, um alt verður ov gjøgnumhugsað, men tað skal so standa fyri mína egnu rokning. “The Flying Elephant” hjá Punjab fær fýra stjørnur út av fimm. Saksofonin fær tó fimm! tónleikur Saksofonsligur atdráttartónleikur frá Punjabi Ummæli