hósdagur 29. oktober 2015síða 29

FRÍGGJADAGUR 30. OKTOBER 2015 SOSIALURIN 125 29 Fyrsta útgávan frá Ranchusi er sera áhugaverd og bjóðar okkum ein túr aftur til alternativa rokkin í 90-unum, men tó við einum nútíðarhóskandi ljóði SIGURJÓN EINARSON F yrr í ár kom fyrsta útgávan frá Ranchus út, ið ber sera langa heitið: »Feeling Like A Caged Lion Pacing Behind One Way Glass«, sum eg haldi eigur at sleppa at fáa nøkur orð við á veg­ num. Talan er um rættiligan nýggj­ an bólk, ið varð stovnaður á heysti 2013. Navnið á bólkinum er eftir »konginum av øllum gullfiskum, Ranchu«, sum hevur sín uppruna í Japan. Hesir fýra gullfiskarnir í Ranchus eru: Ólavur á Skipagøtu á bass, Hans Andrias Gregoriussen, trumm­ur, Sjúrður Samuelsen, gittar og Sig­mund Zachariassen, gittar og sang. Útgávan er upptikin í Studio Nykur, har Sigmund Zachariassen hev­ur produserað, meðan Dan Ran­ dall frá Mammoth Sound Mastering í Kalifornia hevur mastrað løgini. Huglagið á »Feeling Like A Caged Lion Pacing Behind One Way Glass«. Og hvat er hetta so fyri tónleikur, ið Ranchus borðreiðir við á útgávuni? Tað fyrsta, ið rennur mær til hugs, er blandað bomm! Útgávan bjóðar okk­um eitt sindur av hvørjum. Her eru sterk, søt og súr bomm. Ja, bomm í ymiskum støddum og smakk­um. Til tíðir er tónleikurin ágang­andi og punk kendur, til tíðir myrkur og melankolskur, men gjøg­ numgangandi er ljóðið eins og frá alternativa rokkinum í 1990-unum, og tað er rættiliga áhugavert, tá hugs­að verður um, at ungu limirnir í bólk­inum nokk heldur grulvaðu ella tóku síni fyrstu fet miðskeiðis í 90-unum. Men tað er ikki so farligt, tí tónleikurin ljóðar á ongan hátt fornaldarsligur, hóast sterkar røtur aftur til 90-ini. Ljóðið er eisini gott á út­gávuni, sum ger, at tað ljóðar natúrligt og ágangandi, sum rokkur nú einaferð skal ljóða. Beint fram og einki tvætl! Alt hetta er við til at geva okkum ein posa av góðum, blandaðum bommum, næstan heilt góðum bommum, um tað ikki var fyri einum lítlum rotnum bommi í posanum, men tað komi eg seinni inn á. Løgini Fløgan byrjar við tveimum punk- løgum – við einum ferili av grunge, har tónleikurin koyrir beint fram, har ein fær eina ábending um, at soleiðis fer restin av fløguni at ljóða, men soleiðis er ikki. Tá triði sangurin »Dew« fer frá, eru vit afturi í tíðini, tá Radiohead góvu sínar fyrstu útgávur út. Hetta hoyra vit eisini í sanginum »Violet« og »Promises«, men í »Pro­ mises« eru vit í hugaheiminum Radio­head, ið hevur verið eyðkent meira í seinnu árunum hjá bretska bólk­inum. Røddin hjá Sigmundi rigg­ar kanska best til júst hendan tón­leika­formin, har hann – eins og Thom York – brúkar sína bráræsnu og kenslu­ligu rødd, sum hóskar seg væl til alternativan rokk. Hetta kemur best til sjóndar í Smashing Pum­pkins-líknandi lagnum, »Cuz of You«. Løgini »Promises« og »Revolver« eru í myrka og melankolska horn­ inum, áðrenn »Lost in the Woods« leiðir okkum burtur úr myrkrinum aftur og inn í hugaheimin hjá Radio­ head aftur, har bólkurin virkar til at hava rætta fótafestið við ljómandi og melankolska rokkinum, ið bjóðar tær upp til dans í »Violet«, har ein bara skal taka ímóti tónleikinum og hoppa og dansa, tá niðurlagið kemur. Næstseinasta lagið á útgávuni er tó mær ein gáta. Her kemur rotna bommið á útgávuni, tíverri. Meginparturin av sanginum »Clog« er heilt fantastiskt, men við einari fjákutari byrjan og enda á lagnum, har serliga endin er heilt fjákutur, fær meg ikki heilt at taka bólkin heilt í álvara. Skilji ikki heilt, hví ein somikið góður og rokkutur sangur, ið gevur okkum ein deiligan fokk jú-fingur stóran part av sanginum, skal enda við einum tílíkum nú-speeda-vit- bara-alt-upp-til-helvitis. Hetta ør­ kymlar og øsir meg sum áhoyrara, og tað er spell fyri eitt so gott lag annars. Seinasta lagið er eitt cover-lag av sanginum hjá Iggy Pop »I Wanna Be Your Dog«, ið Ranchus avgreiðir heilt væl. Niðurstøða Hetta er ein sera spennandi og áhugaverd útgáva, ið fer nógvar vegir, sum tó riggar væl til ljóðið á fløguni. Løgini eru deiliga ymisk og gevur hetta útgávuni eina góða breidd. Tíverri er royndin við »Clog« eitt undantak, og kanska eisini eitt lítið mistak. Lagið hevur allar møguleikar at verða gott. Tað hevði kanska verið uppá sítt pláss, um bólkurin fekk eitt mótspæl, tá fløgan varð produserað ella vit fáa eina meira útvarpsvinaliga útgávu av júst hesum sangi. Men alt í alt ein góð og góðkend byrjan frá Ranchus, ið fær tríggjar út av fimm stjørnum. TÓNLEIKUR BLANDAÐ BOMM FRÁ RANCHUSI ★★★★★ Ummæli