hósdagur 17. mai 2018síða 15

FRÍGGJADAGUR 18. MAI 2018 SOSIALURIN 56 15 – Eg havi ikki verið serliga góður til at síggja forðingar við mínari sjúku. Eg havi gjørt alt tað, ið onnur hava gjørt og kanska eitt sindur út yvir tað eisini, sigur Ragnar Isaksen. Við tað meinar hann, at hóast sjúkan avmarkar ein á nøkrum økjum, so merkir tað, at man bara ger tað meira á øðrum økjum. – Man er eitt sindur tarnaður, men so ger man tað, ið man kann. Seinastu tvey árini havi eg verið sjúkari enn áður og havi ikki fingið arbeitt á sama hátt, men eg havi ikki sett meg aftur fyri tað. Vit við Cystiskari fibrosu koma upp á tindarnar sum øll onnur. Bæði innan arbeiði og ítrótt. Sjúkan skal ikki sleppa at vera ein forðan at liva eitt so vanligt lív, sum man einaferð kann, sigur Ragnar Isaksen og leggur afturat. – Men nú eg eri vorðin eldri, so má eg eisini góðtaka, at orkan er ikki tann sama. Men tað fær meg ikki at taka synd í mær sjálvum. Í staðin seti eg mær bara onnur mál, ið eru innan fyri tær rammurnar, ið nú eru galdandi. Avrika nógv At fólk við Cystiskari fibrosu náa tey mál, ið tey seta sær fyri, eru fleiri góð dømir um. Sjálvur hevur Ragnar Isaksen íðkað nógvan ítrótt gjøgnum árini, harímillum golf, har hann hevur vunnið fleiri FM- meistaraheiti og hevur umboðað Føroyar á Oyggjaleikunum fýra ferðir. Harafturat hevur hann runnið Copenhagen Marathon og skal í summar súkkla til París við Team Rynkeby. Alt hetta hóast hansara lungnafunksjón er skerd vegna sjúkuna. – Tað er generelt fyri tey fólk við Cystiskari fibrosu, ið eg kenni, at tey náa stór mál. At renna eitt marathon er eitt stórt mál hjá øllum, óansæð um man er frískur ella sjúkur. Tað hava bæði eg og Helena Dahl Olsen megnað, meðan onnur hava runnið hálv marathon. At vit gera tað við okkara lungnafunksjón er heilt fantastiskt. Høgni Kunoy Dávason er eitt annað dømi. Hann er kendur um allan heim fyri Taekwondovirksemið sítt, sigur Ragnar Isaksen og heldur á. – Vit hava okkurt í okkum. Tað er nokk tað, at vit muga kempa fyri lívinum hvønn dag. Vit kunnu eins væl gera tað øgiliga gott, tá ið vit allíkavæl gera tað. Til París Tað nýggjasta málið hjá Ragnari Isaksen er at súkkla til París við Team Rynkeby. Fyrireikingarnar til ferðina suður gjøgnum evropeiska meginlandið hava tó verið tarnaðar av sjúku. – Eg eri viknaður nógv seinastu vikurnar, tí eg havi verið ræðuliga hart raktur av sjúku í alt ár. Eg fekk hasa influensuna, ið øll fingu. Eitt er tá frísk fáa hana, men vit við Cystiskari fibrosu fáa vaksinu móti slíkum, tí vit eru í vandabólkinum. So tá hon rakar við síðuna av, ið hon gjørdi í ár, so verða vit eyka hart rakt. Tað hava einans verið tvær vikur í vetur, har eg ikki var sjúkur, sigur Ragnar Isaksen, ið av somu orsøk er regluliga á Landssjúkrahúsinum fyri at fáa IV í æðrarnar. Júst tað, at ein so vanlig sjúka skal oyðileggja so nógv, meðan vant verður móti einum ítøkiligum máli, kann gerast øgiliga ørkymlandi, viðgongur Ragnar Isaksen. – Eg havi aldrin passað meg so væl sum nú og vant so nógv sum nú, men kortini eri eg veikur og havi tað ringt. Tað er hart, og tað ávirkar ein psykiskt. Men nú havi eg verið í Danmark, og royna vit nú at loysa hetta, sigur Ragnar Isaksen. Heldur enn at venjingin er vorðin ein byrða hesa tíðina, so vísir hann á, at tað hevur hjálpt honum nógv at vant við hinum súkklarunum. – Hóast tað er strævið, so hevur Team Rynkeby hjálpt mær. Tað hjálpir mær at flýggja frá sjúkuni. Tá man súkklar á vegnum, so miðsavnar man seg um tey, ið eru frammanfyri og aftanfyri. Man hevur ikki tíð at hugsa um nakað annað, sigur Ragnar Isaksen. HALLUR@SOSIALURIN.FO Hóast tað er strævið, so hevur Team Rynkeby hjálpt mær. Tað hjálpir mær at flýggja frá sjúkuni. Tá man súkklar á vegnum, so miðsavnar man seg um tey, ið eru frammanfyri og aftanfyri. Man hevur ikki tíð at hugsa um nakað annað